Դրամա «Ավիվայում».  Հայաստանի հավաքականը գոլառատ խաղում պարտվեց Իռլանդիային 🎥

Դրամա «Ավիվայում». Հայաստանի հավաքականը գոլառատ խաղում պարտվեց Իռլանդիային 🎥

28/09/2022 - 00:37

Ազգերի լիգայի B դիվիզիոնի 1-ին խմբի վերջին` 6-րդ տուրում Հայաստանի հավաքականը Դուբլինի «Ավիվա» մարզադաշտում մրցեց Իռլանդիայի ընտրանու դեմ։

Մինչև հանդիպման 71-րդ րոպեն Հայաստանի հավաքականի խաղում ոչինչ չէր ստացվում և Խոակին Կապառոսի թիմը պարտվում էր 0:2 հաշվով։

Տանտերերի կազմից 18-րդ ու 52-րդ րոպեներին աչքի էին ընկել համապատասխանաբար Ջոն Էգանն ու Մայքլ Օբաֆեմին։

Այդուհանդերձ, մեր ընտրանին սառը ցնցուղ էր պատրաստել իռլանդացիների համար` երկու րոպեում ոչ միայն կրճատելով, այլև հավասարեցնելով հաշիվը. 71-րդ րոպեին գոլի հեղինակ դարձավ Արտակ Դաշյանը, իսկ 73-րդ րոպեին` Էդուարդ Սպերցյանը։

83-րդ րոպեին աչքի ընկնելուն շատ մոտ էր Խորեն Բայրամյանը, սակայն նրա հարվածը մի փոքր շեղ ընթացավ։

87-րդ րոպեին Արտակ Դաշյանը սեփական տուգանային հրապարակում ձեռքով խաղաց, ինչից հետո գլխավոր մրցավար Ռադե Օբրենովիչը, դիտելով դրվագի տեսակրկնապատկերը, 11-մետրանոց նշանակեց Հայաստանի դարպասին։

11-մետրանոցի հաստատումից հետո կրքերը թեժացան, ինչի արդյունքում Հովհաննես Համբարձումյանը պատժվեց կարմիր քարտով և հեռացվեց դաշտից։

Ձեռքով խաղի համար երկրորդ դեղին քարտն ստացավ նաև Արտակ Դաշյանը, ով նույնպես հեռացվեց դաշտից։

11-մետրանոցը Ռոբի Բրեյդին դիպուկ իրացեց և 3:2 հաշվով հաղթանակ պարգևեց Իռլանդիային։

Այս խմբում կայացավ ևս մեկ հանդիպում.

Ուկրաինա 0:0 Շոտլանդիա

B դիվիզիոնի 1-ին խումբը վերջին տուրից հետո ստացավ հետևյալ տեսքը.

  1. Շոտլանդիա – 13 միավոր
  2. Ուկրաինա – 11 միավոր
  3. Իռլանդիա – 7 միավոր
  4. Հայաստան – 3 միավոր

Այսպիսով, Հայաստանի հավաքականը դուրս մնաց B դիվիզիոնից և մրցաշարի հաջորդ խաղարկությունում հանդես կգա C դիվիզիոնում։

Շոտլանդիայի հավաքականն էլ նվաճեց A դիվիզիոնի ուղեգիր։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2022