Մեկ գնդակով՝ երկու նապաստակ! Բավարիայի 17-ամյա ֆուտբոլիստը տպավորիչ ցուցանիշներ գրանցեց

Չեմպիոնների լիգայի 1/8 եզրափակչի շրջանակում «Բավարիան» հյուրընկալվելիս 4։1 հաշվով ջախջախեց «Լացիոյին»։

Հանդիպման 24-րդ րոպեին մյունխենյան ակումբի կազմում գոլի հեղինակ դարձավ 17-ամյա կիսապաշտպան Ջամալ Մուսիալան, ով մեկ գնդակով միանգամից երկու տպավորիչ ցուցանիշ է գրանցել։

Ինչպես հայտնում է OptaFranz-ը, անգլիացի կիսապաշտպանը դարձել է «Բավարիայի» կազմում Չեմպիոնների լիգայի շրջանակում երբևէ գոլի հեղինակ դարձած ամենաերիտասարդ ֆուտբոլիստը։

Մուսիալան հանդիպման օրը եղել է 17 տարեկան և 363 օրական։

OptaJoe-ն գրում է, Մուսիալան դարձել է նաև ամենաերիտասարդ անգլիացի ֆուտբոլիստը, ով գոլի հեղինակ է Չեմպիոնների լիգայի շրջանակում։

Ինչ վերաբերվում է Չեմպիոնների լիգայի փլեյ-օֆֆ փուլին, ապա Մուսիալան դարձել է երկրորդ ամենաերիտասարդ ֆուտբոլիստը, ով գոլի հեղինակ է դարձել հեղինակավոր մրցաշարի փլեյ-օֆֆ-ում։

17-ամյա ֆուտբոլիստն իրենից առաջ թողեց միայն «Բարսելոնայի» նախկին հարձակվող Բոյան Կրկիչին, ով 2008 թվականի ապրիլի 1-ին «Շալկե-04»-ի դեմ քառորդ եզրափակչի խաղում գոլի հեղինակ է դարձել 17 տարեկան և 217 օրական հասակում։

Հավելենք, որ Ջամալ Մուսիալան ծնվել է Գերմանիայում՝ Շտուտգարտ քաղաքում, սակայն ունի ինչպես Գերմանիայի, այնպես էլ Անգլիայի քաղաքացիութուն։

Պատանի ֆուտբոլիստը հանդես է եկել Անգլիայի տարբեր տարիքային հավաքականներում՝ Մ-15, Մ-16, Մ-17։ Խաղացել է նաև Գերմանիայի Մ-16 տարեկանների հավաքականում՝ անցկացնելով 2 հանդիպում։

Այժմ Մուսիալան Անգլիայի Մ-21 տարեկանների հավաքականում է հանդես գալիս։

Նշենք, որ Մուսիալան, չնայած ծնվել է Գերմանիայում, սակայն «Չելսիի» մարզադպրոցի սան է, որի համակարգում եղել է 2011-2019 թթ․, ինչից հետո տեղափոխվել է «Բավարիա», որի գլխավոր թիմում իր նորամուտը նշել է 2019/20 մրցաշրջանում՝ Բունդեսլիգայի նախավերջին՝ 33-րդ, տուրում՝ փոխարինման մտնելով «Ֆրայբուգրի» դեմ խաղում։

Ընթացիկ մրցաշրջանում Մուսիալան մյունխենյան ակումբի կազմում բոլոր մրցաշարերի շրջանակում մասնակցել է 25 հանդիպման՝ դառնալով 4 գոլի հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am