Բարսելոնան իտալական գրանդի հետ բանակցություններ է վարում Դեպայի հավանական տեղափոխության հարցում

«Բարսելոնայի» հարձակվող Մեմֆիս Դեպայը, հնարավոր է, հեռանա ակումբից և կարիերան շարունակի իտալական Ա սերիայում։

Ինչպես տեղեկացնում է Diario Sport-ը, «Յուվենտուսը» հոլանդացի ֆուտբոլիստի վարձակալության հարցում բանակցություններ է վարում «բլաուգրանայի» հետ, սակայն գործարքի կայացման համար անհրաժեշտ է, որ Դեպայը մեկ տարով երկարաձգի պայմանագիրը կատալոնական ակումբի հետ, որն ավարտվում է 2023 թ. հունիսի 30-ը։

Դրան զուգահեռ, 28-ամյա հարձակվողը վստահ չէ, որ պետք է փոխի ակումբային գրանցումը, քանի որ կարծում է, որ «Բարսելոնայում» իրեն դրսևորելու հնարավորություն դեռ կստանա։

Այդ հարցում առանցքային դեր կարող է խաղալ 2022 թվականի աշխարհի առաջնությունից առաջ կանոնավոր խաղային պրակտիկա ունենալու անհրաժեշտությունը։

Նշվում է, որ «Յուվենտուսը» ներկա պահին մտադիր չէ գնել Դեպայի տրանսֆերային ամբողջական իրավունքները, սակայն պատրաստ է պարտադիր գնման իրավունքով վարձակալել նրան։

Սպասվում է, որ հետագայում Մեմֆիսի գործարքը «բյանկոներիների» համար կարժենա մոտ 20 մլն եվրո։

Հիշեցնենք, որ Դեպայը «Բարսելոնայի» շարքերը համալրել է 2021 թ. հուլիսին` անցկացրած 37 խաղում դառնալով 13 գոլի և 2 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am