Ռամոս․ «Նախագահ, ես ցանկանում եմ այլ առաջարկներ լսել»

Ինչպես հաղորդում է Marca-ն՝ հղում անելով El Chiringuito TV-ի լրագրող Խոսեպ Պեդրերոլին, «Ռեալի» պաշտպան Սերխիո Ռամոսը, ամենայն հավանականությամբ, կհեռանա ակումբից մրցաշրջանի ավարտից հետո։

«Արքայական» ակումբն արդեն նոր պայմանագրի առաջարկ արել է իսպանացուն։

«Սերուցքայինների» նախագահ Ֆլորենտինո Պերեսն անձամբ է խնդրել ֆուտբոլիստին համաձայնվել աշխատավարձի 10%-ի չափով նվազեցմանը։

Հայտնի է, որ ակումբը դիմել է բոլոր ֆուտբոլիստներին միևնույն խնդրանքով։

Այս պահի դրությամբ միայն երկու ֆուտբոլիստներ՝ Լուկա Յովիչն ու Մարտին էդեգորն են դրական արձագանք տվել խնդրանքին, սակայն Սերխիո Ռամոսը մերժել է հարազատ ակումբի խնդրանքը։

«Նախագահ, ես ցանկանում եմ այլ առաջարկներ լսել»,- այսպես է արձագանքել 34-ամյա պաշտպանը Ֆլորենտինո Պերեսին։

Այդ պահից հետո բանակցությունները կողմերի միջև հայտնվել են փակուղում։

Ակումբում գիտակցում են, որ Ռամոսը բանակցություններ կարող է վարել այլ ակումբների հետ իր ապագայի շուրջ։

Աղբյուրը հաղորդում է, որ «սերուցքայինների» կողմից այլևս առաջարկներ չեն լինելու։ Որոշումը ֆուտբոլիստինն է․ կա՛մ մնալ ամումբում և համաձայնվել աշխատավարձի նվազեցմանը, կա՛մ փոխել ակումբային գրանցումը։

«Ռեալում» ենթադրում են, որ Ռամոսը կլքի ակումբը հունիսի 30-ին, քանի որ հենց այդ օրն ավարտվում է կողմերի միջև պայմանագիրը, որից հետո իսպանացին ազատ գործակալի կարգավիճակով կարող է տեղափոխվել այլ ակումբ անվճար։

Հիշեցնենք, որ ՊՍԺ-ն Ռամոսին պատարստ է բավական խոշոր գոշոր առաջարկել։ «Պարի Սեն-Ժերմենը» խաղացողին ցանկացնում է 3 տարվա պայմանագիր առաջարկել՝ տարեկան 20 մլն եվրո աշխատավարձով։ Այսինքն, Ռամոսը 3 տարվա ընթացքում կվաստակի 60 մլն եվրո։

Սերխիո Ռամոսը «Ռեալում» հանդես է գալիս 2005 թվականից, որի կազմում անցկացրել է 668 հանդիպում՝ դառնալով 100 գոլի և 40 գոլային փոխանցման հեղինակ։

Հիշեցնենք, որ Ռամոսի և «Ռեալի» միջև գործող պայմանագիրն ավարտվում է 2021 թվականի հունիսի 30-ին և, ըստ ՖԻՖԱ-ի կանոնադրության, արդեն հիմա իսպանացի պաշտպանը կարող է ցանկացած ակումբի հետ բանակցություններ վարել, պայմանագիր համաձայնեցնել և ներկայիս համաձայնագրի ավարտից հետո տեղափոխվել տվյալ ակումբ՝ ազատ գործակալի կարգավիճակով։

Հ․Գ․ Միացեք մեր Telegram-ի ալիքին -> https://t.me/Interfootball_am