Եվրո-2024. հայտնի են դարձել անցումային հանդիպումների C դիվիզիոնի զույգերը

Եվրո-2024-ի հիմանական որակավորման փուլը մոտենում է տրամաբանական ավարտին։

Անցնող օրերին կայացան A, H և J խմբերի վերջին տուրի հանդիպումները, որոնց արդյունքներով Վրաստանի, Ղազախստանի և Լյուքսեմբուրգի հավաքականները չկարողացան նվաճել Եվրո-2024-ի խմբային փուլի ուղեգիր։

Այդուհանդերձ, այդ հավաքականներն Ազգերի լիգայի 2022/23 խաղարկության C դիվիզիոնի իրենց ենթախմբերում հաղթելու շնորհիվ հնարավորություն են ստացել մասնակցելու Եվրո-2024-ի անցումային հանդիպումներին։

C դիվիզիոնի անցումային հանդիպումներին մասնակցելու է նաև Հունաստանի հավաքականը, որը Եվրո-2024-ի որակավորման B խմբի վերջին խաղն անցկացնելու է նոյեմբերի 21-ին, սակայն արդեն զրկվել է այդ ճանապարհով մրցաշարի խմբային փուլի ուղեգիր նվաճելու հնարավորությունից։

Նշենք, որ ՈւԵՖԱ-ի պաշտոնական կայքից տեղեկանում ենք, որ C դիվիզիոնի անցումային հանդիպումների շրջանակում արդեն ձևավորվել են հետևյալ զույգերը.

Վրաստան – Լյուքաեմբուրգ

Հունաստան – Ղազախստան

Նշենք, որ փոքրիկ մրցաշարն անցկացվելու է փլեյ-օֆֆ ձևաչափով։ Երկու դիմակայությունների հաղթողները հանդիպելու են միմյանց և պարզելու Եվրո-2024-ի խմբային փուլի ուղեգրերից մեկը։

Եզրափակիչ հանդիպման տանտերը կորոշվի նոյեմբերի 23-ին կայանալիք վիճակահանության միջոցով։

Ավելացնենք, որ անցումային հանդիպումների կիսաեզրափակիչները կկայանան 2024 թ. մարտի 21-ին, իսկ եզրափակիչը` մարտի 26-ին։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am