Ատլետիկոն շուտով կհայտարարի Լիոնի հարձակվողին ձեռք բերելու մասին

Ատլետիկոն շուտով կհայտարարի Լիոնի հարձակվողին ձեռք բերելու մասին

12/01/2021 - 01:05

«Լիոնի» կենտրոնական հարձակվող Մուսա Դեմբելեն, ամենայն հավանականությամբ, մոտ օրերս կդառնա «Ատլետիկո Մադրիդի» ֆուտբոլիստ։

Ինչպես տեղեկացնում է իտալացի լրագրող Ֆաբրիցիո Ռոմանոն, մադրիդյան ակումբը Դեմբելեին դիտարկում է որպես վերջերս ակումբից հեռացած Դիեգո Կոստայի փոխարինող։

Աղբյուրի փոխանցմամբ՝ «հնդկացիները» վարձակալելու են ֆուտբոլիստին՝ հետագայում 33 մլն եվրոյի դիմաց խաղացողին գնելու իրավունքով։

Կողմերն արդեն համաձայնեցրել են 24-ամյա ֆուտբոլիստի անձնական պայմանագրի կետերը, իսկ մոտ օրերս նա կմեկնի Մադրիդ, որպեսզի ավարտին հասցնի իր տեղափոխությունը։

Մուսա Դեմբելեի տեղափոխության մասին լուրերը հաստատել է նաև մադրիդյան ակումբի գլխավոր մարզիչ Դիեգո Սիմեոնեն․

«Գործարքը դեռևս վերջնական կայացած չէ, սակայն, այո՛, մենք նրա հետ պայմանագիր կնքելու շուրջ վերջնական բանակցություններ ենք վարում»,- արգենտինացի մասնագետի խոսքերը մեջբերում է Ֆաբրիցիո Ռոմանոն՝ հղում կատարելով իսպանացի լրագրող Դավիդ Վինուեսային։

Մուսա Դեմբելեն «Լիոնի» գույները պաշտպանում է 2018 թվականի օգոստոսից։ Այդ ժամանակ ֆրանսիական ակումբը խաղացողի դիմաց «Սելթիկին» վճարել է 22 մլն եվրո, իսկ մինչ այս պահը նա «Լիոնի» կազմում անցկացրել է 108 հանդիպում՝ դառնալով 45 գոլի և 13 գոլային փոխանցման հեղինակ։

# , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023