Պարագվայը խոշոր անակնկալ մատուցեց` հաղթելով Արգենտինային 🎥

Աշխարհի 2026 թ. առաջնության Հարավային Ամերիկայի գոտու որակավորման փուլի 11-րդ տուրում Պարագվայի հավաքականը Ասունսյոնի «Դեֆենսորես դել Չակո» մարզադաշտում մրցեց Արգենտինայի դեմ։

Առաջ ընկնելով` նշենք, որ խոշոր անակնկալ գրանցվեց. Պարագվայը 2:1 հաշվով կամային հաղթանակ տարավ։

«Ալբիսելեստեից» 11-րդ րոպեին հաշիվը բացեց Լաուտարո Մարտինեսը, որին մրցակիցը պատասխանեց Անտոնիո Սանաբրիայի ու Օմար Ալդերետեի դիպուկ հարվածներով։

Նշենք, որ հանդիպման մեծ մասում Լիոնել Սկալոնիի գլխավորած Արգենտինայի հավաքականն ուներ տարածքային լուրջ առավելություն և գնդակին տիրում էր ժամանակի 71 տոկոսը, սակայն «Ոսկե գնդակի» 8-ակի դափնեկիր Լիոնել Մեսին և խաղընկերները ոչինչ չկարողացան առաջարկել մրցակցին։

Պարագվայն Արգենտինային նախորդ անգամ հաղթել էր 2016 թ. հոկտեմբերի 12-ին, երբ աշխարհի 2018 թ. որակավորման փուլում արտագնա խաղում առավելության էր հասել 1:0 հաշվով։

Այդ հաղթանակից հետո Գուստավո Ալֆարոյի գլխավորած թիմը 16 միավորով զբաղեցնում է 6-րդ տեղը, Արգենտինան 22 միավորով շարունակում է գլխավորել մրցաշարային աղյուսակը։

Հիշեցնենք, որ ընտրական այս գոտուց աշխարհի առաջնության ուղեգիր նվաճելու են լավագույն 6 հավաքականները, իսկ 7-րդ տեղը գրաված թիմը միջմայրցամաքային անցումային հանդիպում է անցկացնելու։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից