Լայպցիգի պաշտպանը դառնալու է ոսկրածուծի դոնոր

Ինչպես տեղեկացնում է Kicker-ը, «Լայպցիգի» պաշտպան Վիլի Օրբանը փետրվարի 8-ին դառնալու է ոսկրածուծի դոնոր։

Հայտնի է, որ հունգարացի պաշտպանը 2017 թ. գրանցված է դոնորների հատուկ բազայում և պարբերաբար օգնում է դրա կարիքն ունեցող մարդկանց։

Փետրվարի 5-ից 30-ամյա պաշտպանը չի մարզվել «ցլերի» կազմում, քանի որ ծանուցում է ստացել, որ հնարավորություն ունի օգնել ոսկրածուծի փոխպատվաստման կարիք ունեցող մարդկանցից մեկին.

«Իհարկե, սկզբում մի փոքր զարմացա, որ կարող եմ դոնոր դառնալ, սակայն, առանց վարանելու ես ընդունեցի այդ առաջարկը։ Սա հնարավորություն է տալիս շատ քիչ ջանքերով փրկել մեկ այլ մարդու կյանքը, այդ պատճառով էլ ես այլ տարբերակ չունեի։

Հուսով եմ` կօգնեմ տվյալ մարդուն լիարժեք ապաքինվել»,- նշել է Օրբանը։

Մեծ է հավանականությունը, որ այդ գործընթացի պատճառով Օրբանը բաց կթողնի փետրվարի 11-ին Բունդեսլիգայի 20-րդ տուրում կայանալիք «Ունիոն Բեռլինի» դեմ կայանալիք հանդիպումը։

«Այո՛, հնարավոր է` բաց թողնեմ «Ունիոնի» դեմ կայանալիք հանդիպումը։ Այդուհանդերձ, չնայած իմ սպորտային ամբիցիաներին` այժմ դա երկրորդական է։ Ովքեր ինձ ճանաչում են, գիտեն, որ կանեմ հնարավոր ամեն բան, արագ «Լայպցիգի» շարք վերադառնալու համար»,- հավելել է հունգարացի պաշտպանը։

Վերջում ավելացնենք, որ Վիլի Օրբանը «Լայպցիգի» կազմում հանդես է գալիս 2015 թ. հուլիսից` անցկացրած 269 խաղում դառնալով 25 գոլի և 8 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am