«Դեպքը եղել է լրիվ այլ կերպ»․ պարզաբանում է Մալաքյան եղբայրների պաշտպանը

Ինչպես հայտնի է, օգոստոսի 30-ին Երևանում՝ «Կասկադի» հարևանությամբ անկարգություններ են տեղի ունեցել, ինչի արդյունքում ձերբակալվել են «Արարատի» ֆուտբոլիստ Էդգար Մալաքյանը, ինչպես նաև նրա եղբայր Գոռ Մալաքյանը, ով ներկայացնում է «Փյունիկը»։

Ըստ պաշտոնական տեղեկատվության, որը տարածել է Հայաստանի Հանրապետության քննչական տեսչությունը՝ այդ օրը՝ ժամը 23։20-ին, ՀՀ ոստիկանության կապիտանը զեկուցագիր է ներկայացրել այն մասին, որ նույն օրը՝ ժամը 23:15-ի սահմաններում, ստացված հաղորդման հիման վրա՝ մեկնել են «Կասկադ», որտեղ  նկատել են երկու երիտասարդների, ովքեր քաշքշել են ոստիկանության երկու ծառայողի: Նշված երկու երիտասարդները տևական ժամանակ  բարձրաձայն հայհոյանքներ են հնչեցրել, նրանցից մեկը քաշել և պոկել է ոստիկանության ծառայողներից  մեկի ուսադիրը:

Հայտնի է, որ դեպքի առթիվ հարցուվել է քրեական գործ՝ ՀՀ քրեական օրենսգրքի 316-րդ հոդվածի (իշխանության ներկայացուցչի նկատմամբ բռնություն գործադրելը) 1-ին մասով և 258-րդ հոդվածի (խուլիգանություն) 1-ին մասով, որը նախաքննության կատարման համար ուղարկվել է ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժին և ընդունվել վարույթ:

Սակայն, ֆուտբոլիստների իրավապաշտպան Գոռ Միքայելը հերքում է եղելությունը՝ նշելով հետևյալը․

«Վստահ եմ, որ եթե տվյալ տեղեկատվությունը տարածողները մի պահ մտածեին, թե ինչպես են խախտում Մալաքյանների անմեղության կանխավարկածը կամ իրենց գործողություններով` թերի եւ միակողմանի դեպքը ներկայացնելով ինչպիսի մեծ հարված են հասցնում Հայաստանի ազգային հավաքականին եւ առհասարակ հայկական ֆուտբոլին` կանգ կառնեին։

Որպես ֆուտբոլիստների պաշտպան, փաստում եմ, որ տարածված տեղեկատվությունը խիստ սուբյեկտիվ է, միակողմանի, ուռճացված եւ թերի: Իրականում, եթե նույնիսկ հավատանք ոստիկանների` քրեական գործի շրջանակներում պնդումներին, դեպքը եղել է լրիվ այլ կերպ, սակայն հանրությանն է մատուցվում լրիվ այլ կերպ:

Կարծում եմ շուտով ականատես կլինեք հերքումների հենց տեղեկատվությունը տարածած պաշտոնական աղբյուրների կողմից:

Հ.Գ. Զորակցության խոսքերի համար Մալաքյաններն իրենց շնորհակալությունն են հայտնում իրենց խաղի եւ ազգային հավաքականի հազարավոր երկրպագուներին, հարյուրավոր խաղընկերներին, մարզիչներին»,- գրել է Միքայելյանը իր Facebook-ի օգտահաշվում։