Գվարդիոլա. «Արսենալի համար մրցաշրջանի յուրաքանչյուր հանդիպում էլ եզրափակիչ է»

Անգլիական Պրեմիեր լիգայի 33-րդ տուրի կենտրոնական խաղում «Մանչեսթեր Սիթին» սեփական հարկի տակ կմրցի «Արսենալի» դեմ։

Տեղի ունեցած մամուլի ասուլիսի ժամանակ «քաղաքաբնակների» գլխավոր մարզիչ Պեպ Գվարդիոլան խոսել է կայանալիք հանդիպման մասին.

«Մի քանի շաբաթ առաջ արդեն ասել եմ այս միտքը. եթե մրցաշրջանի ավարտին պարտվենք որևէ խաղում, ուրեմն ամեն ինչ տեղում կավարտվի։

Երբ նման իրավիճակում լինում ես հոկտեմբեր կամ նոյեմբեր ամիսներին, նման զգացողություն չի լինում։

Իմ գլխավորությամբ Պրեմիեր լիգայի առաջին մրցաշրջանն սկսեցինք այնպես կարծես բոլոր խաղերը եզրափակիչներ են։ Եվ, իրոք, յուրաքանչյուր հանդիպում եզրափակիչ էր։ Ես շատ լավ հիշում եմ դա։

Այժմ, կողքից հետևելով «Արսենալի» խաղին, կարող եմ ասել, որ նրանց համար նույնպես յուրաքանչյուր հանդիպում էլ եզրափակիչ է։

Երկու անընդմեջ չեմպիոնական տիտղոսներից հետո մրցաշրջանի սկզբից բոլոր խաղերը եզրափակիչի չեն վերածվել։

Այժմ, հատկապես վերջին մի քանի ամիսներին, երբ խաղում ենք Չեմպիոնների լիգայում, Անգլիայի գավաթում, Պրեմիեր լիգայում, նկատում ենք, որ մրցաշրջանի ավարտն արդեն մոտենում է։

Ստեղծված իրավիճակում հասկանում ենք, թե հանուն ինչի ենք խաղում։ Ամեն ինչ մեր ձեռքում է։ Անկասկած` նաև «Արսենալի»։

Այս խաղը կարևոր է, սակայն` ոչ վճռորոշ, քանի որ երկու ակումբներն էլ դեռևս ծանր խաղեր ունեն, սակայն տվյալ հանդիպման կարևորությունը մենք չենք անտեսում»,- Գվարդիոլայի խոսքերը մեջբերում է Sky Sports-ը։

Հավելենք, որ «Մանչեսթեր Սիթի» – «Արսենալ» հանդիպումը կկայանա ապրիլի 26-ին` Երևանի ժամանակով 23:00-ից։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am