Գերմանիայի ֆուտբոլային միությունը Ֆլիկին փոխարինելու մի շարք տարբերակներ է դիտարկում

Գերմանիայի հավաքականում, հնարավոր է, շուտով կրկին մարզչական փոփոխություն տեղի ունենա։

Ինչպես տեղեկացնում է Bild-ը, Գերմանիայի ֆուտբոլային միությունը դժգոհ է ներկայիս գլխավոր մարզիչ Հանսի Ֆլիկի կատարած աշխատանքից։

«Բունդեսմանշաֆթը» վերջին 15 խաղերում տոնել է միայն 4 հաղթանակ, իսկ վերջին 4 խաղերում կրել 3 պարտություն։

Աղբյուրի փոխանցմամբ` Գերմանիայի ֆուտբոլային միության նախագահ Բերնդ Նոյենդորֆը Ֆլիկին ևս երկու հանդիպման հնարավորություն է տվել` ապացուցելու, որ ի զորու է մարտունակ հավաքական պատրաստել Եվրո-2024-ի համար, որը տնային է լինելու «բունդեսմանշաֆթի» համար։

Հաղորդվում է, որ ԳՖՄ-ն սկսել է նաև Ֆլիկին փոխարինելու տարբերակներ դիտարկել։

Նշվում է, որ 58-ամյա մասնագետին փոխարինելու հիմնական թեկնածուները Յուլիան Նագելսմանը, Օլիվեր Գլասները, Շտեֆան Կունցն ու Ռոդի Ֆյոլերն են։

Հավելենք, որ ներկայումս Գլասները մարզում է «Այնտրախը», Կունցը` Թուրքիայի հավաքականը, իսկ Ռուդի Ֆյոլերը զբաղեցնում է Գերմանիայի ֆուտբոլային միության սպորտային տնօրենի պաշտոնը։

Ֆյոլերը 2000-04 թթ. արդեն մարզել է Գերմանիայի հավաքականը, որի ղեկին ԱԱ-2002-ին հասել է մինչև եզրափակիչ` 0:2 հաշվով զիջելով Բրազիլիային։

Ավելացնենք, որ Գերմանիայի հավաքականը սույն թվականի սեպտեմբերին երկու ընկերական հանդիպում է անցկացնելու և կմրցի համապատասխանաբար Ճապոնիայի ու Ֆրանսիայի դեմ։

Հիշեցնենք, որ Հանսի Ֆլիկը Գերմանիայի հավաքականի գլխավոր մարզչի պաշտոնն ստանձնել է 2021 թ. օգոստոսին` փոխարինելով Յոաքիմ Լյովին։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am