Գերմանիայի հավաքականը մի շարք ռեկորդներ է սահմանել

Գերմանիայի հավաքականը Եվրո-2024-ի բացման խաղում 5:1 հաշվով ջախջախեց Շոտլանդիայի թիմին։

Squawka Football-ը գրում է, որ այս հաղթանակը Եվրոպայի առաջնությունների բացման խաղերում ամենախոշորն է։ Նախորդ ամենախոշոր հաշվով հաղթանակը տարել էր Իտալիայի հավաքականը, երբ Եվրո-2020-ի առաջին խաղում Թուրքիայի նկատմամբ առավելության հասավ 3:0 հաշվով։

Այդ խաղը նաև ամենագոլառատն է դարձել Եվրոների բացման խաղերում։ Բացման խաղում երբեք երեք գոլից ավելի չէր գրանցվել։

Ընդունված է համարել, որ Եվրոպայի առաջնություններում դասական բացման խաղ կայացել է 1980 թվականից, երբ մրցաշարում սկսեց կիրառվել խմբային փուլ։ 1960-1976 թթ. Եվրոներին մասնակցելու իրավունք ուներ միայն չորս հավաքական, որոնք միմյանց դեմ մրցում էին փլեյ-օֆֆ ձևաչափով։

Բացի այդ, Գերմանիայի հավաքականը Եվրոպայի առաջնություններում տարել է իր ամենախոշոր հաղթանակը։ «Բունդեսմանշաֆթը» մրցաշարում երբեք երեք գնդակից ավելի տարբերությամբ մրցակիցներին չէր հաղթել։

Հավելենք, որ Յուլիան Նագելսմանի թիմը Եվրո-2024-ում հաջորդ հանդիպումն անցկացնելու է հունիսի 19-ին և մրցելու է Հունգարիայի հավաքականի դեմ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am