Բելինգհեմը Գրինվուդին անվանել է «բռնաբար» 🎥

Իսպանական Լա լիգայի 20-րդ տուրից հետաձգված խաղում «Ռեալ Մադրիդը» հյուրընկալվելիս 2:0 հաշվով հաղթեց «Խետաֆեին»

Հանդիպման ընթացքում անախորժ միջադեպ է տեղի ունեցել «արքայական» ակումբի կիսապաշտպան Ջուդ Բելինգհեմի և «Խետաֆեի» հարձակվող Մեյսոն Գրինվուդի միջև։

Բանն այն է, որ հանդիպման ընթացքում Բելինգհեմը Գրինվուդին անվանել է «բռնաբար»։ Այդ մասին գրում է As-ը։

Աղբյուրի փոխանցմամբ` «Խետաֆեի» ներկայացուցիչներից մեկը Լա լիգայի պատվիրակին խնդրել է Բելինգհեմի խոսքը ներառել հանդիպման արձանագրության մեջ։

«Խետաֆեն» վերլուծում է դրվագի տեսանյութը, սակայն մտադիր չէ որևէ բողոք ներկայացնել Լա լիգային։

Մադրիդի արվարձանը ներկայացնող ակումբը ցանկանում է, որ այդ դրվագը Լա լիգան նույնպես ուսումնասիրի և վերջնական որոշում կայացնի։

Հիշեցնենք, որ դեռ 2022 թ. հունվարին Մեյսոն Գրինվուդը կալանավորվել էր` իր ընկերուհուն բռնաբարելու մեղադրանքով։

Այդուհանդերձ, 2023 թ. փետրվարին Մանչեսթերի ոստիկանությունը հայտարարեց, որ Գրինվուդի վրայից հանվել են բոլոր մեղադրանքները։

Նշենք, որ 22-ամյա ֆուտբոլիստի տրանսֆերային իրավունքները պատկանում են «Մանչեսթեր Յունայթեդին», իսկ «Խետաֆեի» կազմում նա հանդես է գալիս վարձավճարով։

Գրինվուդն ընթացիկ մրցաշրջանում անցկացրած 21 խաղում դարձել է 6 գոլի և 4 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am