Արսենալն ու Սիթին Ժեզուսի տրանսֆերի հարցում բանավոր համաձայնության են հասել

«Մանչեսթեր Սիթիի» հարձակվող Գաբրիել Ժեզուսը, ամենայն հավանականությամբ, կարիերան կշարունակի «Արսենալի» կազմում։

Ինչպես տեղեկացնում է ինսայդեր Ֆաբրիցիո Ռոմանոն, գործարքի հարցում երկու ակումբները հասել են բանավոր համաձայնության։

Սպասվում է, որ բրազիլացի հարձակվողի տրանսֆերի դիմաց «զինագործները» «քաղաքաբնակներին» վճարելու են 45 մլն ֆունտ ստերլինգ, սակայն գումարի չափը կարող է դեռևս ավելանալ հավելավճարների տեսքով։

Նշվում է, որ այժմ լոնդոնդյան ակումբի ղեկավարները Ժեզուսի ներկայացուցիչների հետ նրա անձնական պայմանագրի վերջին մանրուքներն են ճշգրտում։

Ակնկալվում է, որ 25-ամյա ֆուտբոլիստը նոր ակումբի հետ կկնքի 5 տարվա պայմանագիր` մինչև 2027 թ. հունիսի 30-ը։

Ռոմանոն գրում է նաև, որ Ժեզուսի ծառայություններով հետաքրքրված են եղել ևս 5 ակումբներ, որոնց անունները չեն հրապարակվում, սակայն բրազիլացի ֆուտբոլիստի հիմնական նպատակն «Արսենալի» շարքերը համալրելն է։

Հավելենք, որ Ժեզուսի` «Արսենալ» տեղափոխության գործարքը դեռևս ավարտված չէ, սակայն գտնվում է վերջնական փուլում։

Մեծ է հավանականությունը, որ «զինագործներն» այն ավարտին կհասցնեն արդեն առաջիկա ժամերին։

Հիշեցնենք, որ Գաբի Ժեզուսը մանկունյական ակումբի շարքերը համալրել է 2017 թ. հունվարին, որի կազմում մինչ օրս անցկացրել է 236 հանդիպում` դառնալով 95 գոլի և 46 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am