Անհավանական թրիլեր «Սերամիկայում». Ռեալն ու Վիլյառեալը գերգոլառատ ոչ-ոքի խաղացին🎥

Իսպանական Լա լիգայի 37-րդ տուրում Մադրիդի «Ռեալը» «Լա Սերամիկա» մարզադաշտում հյուրընկալվելիս մրցեց «Վիլյառեալի» դեմ։

Հանդիպումն անցավ թրիլերային պայքարում, որն ավարտվեց գերգոլառատ` 4:4 հաշվով։

Հանդիպման ընթացքում «արքայական» ակումբը հաղթում էր 4:1, սակայն «Վիլյառեալի» հարձակվող Ալեքսանդր Սորլոթը 48-52-րդ րոպեների ընթացքում երեք գնդակ ուղարկեց Անդրեյ Լունինի պաշտպանած դարպասը և հավասարեցրեց հաշիվը։ Նորվեգացի հարձակվողն այս խաղում դարձավ պոկերի հեղինակ։ Նա Լա լիգայի ընթացիկ մրցաշրջանում մրցակիցների դարպասը գրավել է արդեն 23 անգամ և միանձնյա գլխավորեց լավագույն ռմբարկուների ցուցակը։

«Ռեալի» կազմից դուբլի հեղինակ դարձավ Արդա Գյուլերը, մեկական գոլ էլ խփեցին Խոսելուն ու Լուկաս Վասկեսը։

Կառլո Անչելոտիի թիմն այս ոչ-ոքիից հետո վաստակեց 94 միավոր և գլխավորում է մրցաշարային աղյուսակը։ «Ռեալը» արդեն նվաճել է չեմպիոնի տիտղոսը։ «Դեղին սուզանավը» 52 միավորով 8-րդն է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am