ԱԱ որակավորման փուլ. Պերուն խոշոր անակնկալ մատուցեց` հաղթելով Կոլումբիային
Աշխարհի 2022 թ. առաջնության Հարավային Ամերիկայի գոտու որակավորման փուլի 15-րդ տուրում Կոլումբիայի հավաքականը Բարանկիլիայի «Մետրոպոլիտանո Ռոբերտո Մելենդես» մարզադաշտում մրցեց Պերուի ընտրանու դեմ։
Կոլումբացիները հանդիպման ողջ ընթացքում ունեին տարածքային ու խաղային տոտալ առավելություն, որն արտահայտվել է նաև թվերի տեսքով։
Ռեյնալդո Ռուեդայի սաները հանդիպման ընթացքում կատարել են 30 հարված, սակայն դրանցից միայն 2-ն են դիպուկ եղել. մնացած 28 դեպքերում կա՛մ շեղ են հարվածել, կա՛մ էլ փակվել են մրցակցի պաշտպանների կողմից։
Կոլումբացիները գնդակին տիրել են ժամանակի 69%-ը, իրացրել են 13 անկյունային, կատարել են 472 փոխանցում` 225-ի դիմաց, ինչպես նաև անցկացրել են 95 վտանգավոր գրոհ։
Չնայած նման առավելությանը` տանտերերը նույնիսկ մեկ գնդակ չկարողացան ուղարկել Պեդրո Գալյեսեի պաշտպանած դարպասը։
Դեռ ավելին` պերուացիները 85-րդ րոպեին նետվեցին հակագրոհի ու իրենց ունեցած միակ իրական գոլային պահը վերածեցին դարպասի գրավման. հերոսացավ Էդիսոն Ֆլորեսը։
Հատկանշական է, որ Ռիկարդո Գարեկայի թիմը հաղթանակ կորզեց` կատարած միակ դիպուկ հարվածի շնորհիվ։
Այսպիսով, Պերուի հավաքականը 1:0 հաշվով հաղթեց Կոլումբիային։
Հարավային Ամերիկայի գոտու որոկավորման փուլի 15-րդ տուրում գրանցվել են նաև հետևյալ արդյունքները.
Վենեսուելա 4:1 Բոլիվիա
Չիլի 1:2 Արգենտինա
15-րդ տուրից հետո այս գոտու որակավորման փուլի խումբը ստացավ հետևյալ տեսքը.
- Բրազիլիա* – 36 միավոր
- Արգենտինա* – 32 միավոր
- Էկվադոր – 24 միավոր
- Պերու – 20 միավոր
- Ուրուգվայ – 19 միավոր
- Կոլումբիա – 17 միավոր
- Չիլի – 16 միավոր
- Բոլիվիա – 15 միավոր
- Պարագվայ – 13 միավոր
- Վենեսուելա – 10 միավոր
* – Բրազիլիայի ու Արգենտինայի հավաքականներն արդեն նվաճել են ԱԱ խմբային փուլի ուղեգիր
Հիշեցնենք, որ Հարավային Ամերիկայի գոտուց ԱԱ ուղեգիր նվաճում են լավագույն 4 հավաքականները, իսկ 5-րդ հորիզոնականը զբաղեցրած ընտրանին միջմայրցամաքային անցումային հանդիպում անցկացնելու հնարավորություն է ստանում, որի շրջանակում մրցելու է Ասիայի գոտու 4-րդ որակավորման փուլի հաղթողի դեմ։
Հ․Գ․ միացե՛ք Interfootball-ի Telegram-ի ալիքին https://t.me/Interfootball_am