Հարավային Ամերիկայի Սուպերգավաթը սենսացիոն դափնեկիր ունեցավ 🎥

Արգենտինական «Լանուսը» պատմության մեջ առաջին անգամ նվաճեց Հարավային Ամերիկայի Սուպերգավաթը։

ԿՈՆՄԵԲՈԼ-ի Ռեկոպայի եզրափակիչի պատասխան խաղում Մաուրիսիո Պելեգրինոյի գլխավորած թիմը լրացուցիչ ժամանակը ներառյալ 3:2 հաշվով հաղթեց բրազիլական «Ֆլամենգոյին»։

Դիմակայության առաջին մրցավեճում «Լանուսը» խաղում էլ հաղթել էր 1:0 հաշվով։

Ռիո դե Ժանեյրոնի լեգենդար «Մարականա» ստադիոնում կայացած պատասխան հանդիպման հաշիվը 29-րդ րոպեին բացեց Ռոդրիգո Կաստիլիոն ու առաջ մղեց արգենտինացիներին։

37-րդ րոպեին Ջորջիան դե Արասկաետան աչքի ընկավ 11-մետրանոցից` հավասարեցնելով հաշիվը։

85-րդ րոպեին 11-մետրանոցից գոլ խփեց Իտալիայի ազգային հավաքականի նախկին կիսապաշտպան Ժորժինիոն, առաջ մղեց արդեն Լիբերտադորեսի գործող գավաթակրին` հանդիպումը տեղափոխելով լրացուցիչ ժամանակ։

Լրացուցիչ ժամանակի վերջնամասը Ֆելիպե Լուիսի գլխավորած թիմը ձախողեց` բաց թողնելով երկու գոլ։

«Լանուսից» 118-րդ րոպեին մրցակցի դարպասը գրավեց Խոսե Կանալեն, իսկ 120+2-րդ րոպեին` Դիլան Ակինոն։

Այսպիսով, «նռնագույնները» դիմակայությունում հաղթեցին ընդհանուր 4:2 հաշվով։

Հիշեցնենք, որ «Լանուսը» 2025թ. նոյեմբերին էլ պատմության մեջ երկրորդ անգամ նվաճել էր Լատինական Ամերիկայի նշանակությամբ երկրորդ միջազգային գավաթը` Կոպա Սուդամերիկանան։

Եզրափակիչում արգենտինական ակումբը հետխաղյա 11-մետրանոցներով հաղթել էր բրազիլական ևս մեկ ակումբի` «Ատլետիկո Մինեյրոյին»։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. միացե՛ք Interfootball-ի Instagram-ի էջին https://shorturl.at/6vBml