Ինտերը գոլառատ խաղում հաղթեց Ատալանտային` նվաճելով ՉԼ ուղեգիր🎥

Իտալական Ա սերիայի նախավերջին` 37-րդ տուրում, «Ինտերը» Միլանի «Ջուզեպե Մեացա» մարզադաշտում մրցեց «Ատալանտայի» դեմ։

«Ներաձուրիները» պարզապես շոկային մեկնարկ էին պատրաստել բերգամասկների համար և արդեն 3-րդ րոպեին հաղթում էին 2:0 հաշվով. աչքի ընկան Ռոմելու Լուկակուն ու Նիկոլո Բարելան։

Նախքան ընդիջում հյուրերը Մարիո Պաշալիչի ջանքերով մեկ գնդակ հետ բերեցին։

Այդուհանդերձ, երկրորդ խաղակեսում «Ինտերի» ֆուտբոլիստները շարունակում էին առավելություն ունենալ, ինչի արդյունքում 77-րդ րոպեին Լաուտարո Մարտինեսը հաշիվը դարձրեց 3:1։

Խաղավերջում Ջանպիերո Գասպերինիի թիմը կարողացավ միայն կրճատել հաշվի տարբերությունը. ինքնագոլի հեղինակ դարձավ միլանյան ակումբի դարպասապահ Անդրե Օնանան։

Այսպիսով, «Ինտերը» հաղթեց 3:2 հաշվով, վաստակեց 69 միավոր, բարձրացավ 2-րդ հորիզոնական և առաջնության ավարտից 1 տուր առաջ նվաճեց Չեմպիոնների լիգայի հաջորդ խաղարկության խմբային փուլի ուղեգիր։

«Ատալանտան», 61 միավորով, 5-րդն է։

Ավելացնենք, որ Հենրիխ Մխիթարյանը վնասվածքի պատճառով ընդգրկված չէր միլանյան ակումբի հայտացուցակում։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am