Եվրո-2020. Ֆրանսիա – Գերմանիա

Հունիսի 15-ին կավարտվի Եվրո-2020-ի 1-ին տուրը, իսկ նախքան ավարտվելը մրցաշարի F խմբում թոփագույն հանդիպում ունենք. աշխարհի գործող չեմպիոն Ֆրանսիայի հավաքականը կմրցի Գերմանիայի ընտրանու դեմ։

Հանդիպման մեկնարկը Երևանի ժամանակով նախատեսված է 23:00-ին։

Մրցող կողմերի մարզավիճակները

Ֆրանսիա – Աշխարհի գործող չեմպիոնները վերջին 10 խաղերում տոնել են 7 հաղթանակ, 2 հանդիպում ավարտել են ոչ-ոքի և կրել 1 պարտություն` գնդակների 16:6 հարաբերակցությամբ։

Այդ 10 խաղերի ընթացքում «եռագույնների» միակ պարտությունը եղել է բավական անսպասելի. Ֆրանսիան 2020-ի նոյեմբերի 12-ին ընկեըական խաղում սեփական հարկի տակ 0:2 հաշվով զիջեց Ֆինլանդիայի ընտրանուն։

Սակայն, պետք է նշենք, որ Դիդիե Դեշամի սաները վերջին 4 խաղերում հաղթել են ընդհանուր 9:0 հաշվով։

Գերմանիա – «Բունդեսմանշաֆթը» վերջին 10 խաղերում տոնել է 6 հաղթանակ, 2 հանդիպում ավարտել է ոչ-ոքի, նույնքան խաղում էլ պարտվել է` գոլերի 22:15 հարաբերակցությամբ։

Յոաքիմ Լյովի սաները վերջին շրջանում ակնհայտ խաղային խնդիրներ ունեն։ Գերմանացիները նախորդ խաղերում երկու տարօրինակ պարտություն կրեցին։ Խոսքը, իհարկե, Հյուսիսային Մակեդոնիայի (1:2) և Իսպանիայի (0:6) հավաքականներից կրած պարտությունների մասին է։

Գերմանիայի հավաքականը նույնսիկ եթե հաղթանակ է տոնում որևէ խաղում, ապա չկա նախկին վստահությունն ու կարգապահությունը, ինչի մասին են խոսում նաև պաշտպանությունում բազմաթիվ սխալները։

Հավաքականների կորուստները խաղից առաջ

Ֆրանսիան – հանդիպմանը մոտենում է առանց կորուստների

Գերմանիա – Լեոն Գորեցկա (ազդրի վնասվածք). հարցականի տակ է նաև Յոնաս Հոֆմանի մասնակցությունը

Հավանական մեկնարկային կազմեր

Ֆրանսիա

Դարպասապահ – Ուգո Լյորիս

Պաշտպաններ – Բենջամեն Պավար, Ռաֆայել Վարան, Պրեսնել Կիմպեմբե, Լյուկա Էրնանդես

Կիսապաշտպաններ – Նգոլո Կանտե, Ադրիեն Ռաբիո, Պոլ Պոգբա

Հարձակվողներ – Անտուան Գրիզման, Կարիմ Բենզեմա, Կիլիան Մբապե

Գերմանիա

Դարպասապահ – Մանուել Նոյեր

Պաշտպաններ – Մաթս Հումելս, Անտոնիո Ռյուդիգեր, Մաթիաս Գինտեր

Կիսապաշտպաններ – Ռոբին Գոսենս, Իլկայ Գյունդողան, Տոնի Կրոս, Յոզուա Կիմիխ

Հարձակվողներ – Թոմաս Մյուլլեր, Կայ Հավերց, Սերժ Գնաբրի

Դիմակայության պատմությունը

Կողմերը միմյանց դեմ 31 հանդիպում են անցկացրել. առավելությունը Ֆրանսիայի հավաքականի կողմն է, որը տարել է 14 հաղթանակ, իսկ գերմանացիների ակտիվում կա 10 հաղթանակ, ևս 7 խաղ էլ ավարտվել է ոչ-ոքի։

Ֆրանսիայի հավաքականն այն քիչ մրցակիցներից է Գերմանիայի համար, որի դեմ խաղերում հաղթանակների ու պարտությունների բացասական հարաբերակցություն ունի։

Ընդհանրապես, «եռագույնները» «բունդեսմանշաֆթի» ամենաանհարմար մրցակիցներից մեկն են։ Խոսքը նաև վերջին տարիների մասին է։ Դեշամի թիմը Գերմանիայի դեմ կայացած վերջին 5 խաղերից երեքում հաղթել է, 2 հանիպում էլ ավարտվել է ոչ-ոքի։

Գերմանիայի հավաքականը վերջին անգամ ֆրանսիացիներին հաղթել են 2014 թ. աշխարհի առաջնության քառորդ եզրափակչում` առավելության հասնելով 1:0 հաշվով։

Այս դիմակայության լավագույն ռմբարկուները Ժուսթ Ֆոնտենն ու Անտուան Գրիզմանն են, ովքեր դարձել են 4-ական գոլի հեղինակ։

Հանդիպման գլխավոր մրցավարը

Ֆրանսիա – Գերմանիա հանդիպումը կսպասարկեն իսպանացի մրցավարները` Կառլոս Դել Սերո Գրանդեի գլխավորությամբ, ում եզրերում կօգնեն Խուան Յուստեն և Ռոբերտո Ալոնսոն։

Հանդիպման չորրորդ պաշտոնյա է նշանակվել սերբ Սրջան Յովանովիչը, իսկ VAR համակարգի պատասխանատուները լինելու են Խուան Մարտինես Մունուերան, Խոսե Սանչեսը, Ինիգո Պրիետոն և Ալեխանդրո Էրնանդես Էրնանդեսը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am