Դիբալան հեռանալու է Յուվենտուսից. կողմերի միջև բանակցությունները ձախողվել են

Դիբալան հեռանալու է Յուվենտուսից. կողմերի միջև բանակցությունները ձախողվել են

21/03/2022 - 20:52

«Յուվենտուսի» հարձակվող Պաուլո Դիբալան մրցաշրջանի ավարտից հետո կհեռանա թուրինյան ակումբից։

Ինչպես տեղեկացնում է հանրահայտ ինսայդեր Ֆաբրիցիո Ռոմանոն, արգենտինացի հարձակվողի ու «բյանկոներիների» միջև գործող պայմանագիրն ավարտվում է 2022 թ. հունիսի 30-ին, իսկ դրա երկարաձգման շուրջ բանակցությունները մտել են փակուղի։

Աղբյուրի փոխանցմամբ` «Յուվենտուսի» ղեկավարության ու Դիբալայի գործակալ Խորխե Անտունի միջև վերջին հանդիպումը կայացել է մարտի 21-ի առավոտյան` Թուրինում, սակայն այն որևէ արդյունք չի տվել։

Բանակցությունների ձախողումից հետո 28-ամյա հարձակվողը վերջնական որոշել է հեռանալ «Յուվենտուսից»։

Հատկանշական է, որ 2021 թ. հոկտեմբերին Դիբալան մինչև 2026 թ. հունիսի 30-ը պայմանագիր է համաձայնեցրած եղել թուրինյան ակումբի հետ, որը պետք է ստորագրվեր այդ տարվա դեկտեմբերին, ինչի մասին հայտարարվել էր նաև հրապարակային։

Այդուհանդերձ, «Յուվենտուսի» ղեկավարությունը փոխել է դիրքորոշումը և ցանկացել սպասել մինչև 2022 թ. մարտ, սակայն, ինչպես արդեն նշեցինք, կողմերի միջև նոր բանակցությունները ձախողվել են, որի պատճառների մասին չի բարձրաձայնվում։

Այսպիսով, Պաուլո Դիբալան 2022 թ. հունիսի 30-ից հետո ազատ գործակալի կարգավիճակով կհեռանա թուրինյան ակումբից։

Հիշեցնենք, որ արգենտինացի ֆուտբոլիստը «Յուվենտուսի» կազմում հանդես է գալիս 2015 թ. հուլիսից, որի մարզաշապիկով մինչ օրս անցկացրել է 283 հանդիպում` դառնալով 113 գոլի և 48 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2022