Բարսելոնան հետաքրքրված է Ռոնալդուի ծառայություններով

Բարսելոնան հետաքրքրված է Ռոնալդուի ծառայություններով

06/07/2022 - 10:57

«Մանչեսթեր Յունայթեդի» հարձակվող Կրիշտիանու Ռոնալդուն, հնարավոր է, կարիերան շարունակի «Բարսելոնայի» կազմում։

Ինչպես տեղեկացնում է AS-ը, «բլաուգրանայի» նախագահ Ժոան Լապորտան ու պորտուգալացի ֆուտբոլիստի գործակալ Ժորժե Մենդեշն անցնող օրերին հանդիպել են։

Կողմերը քննարկել են մի շարք տրանսֆերային հարցեր։ Խոսքը Ռուբեն Նևեշի («Վուլվերհեմպտոն»), Բերնարդու Սիլվայի («Մանչեսթեր Սիթի») և Ռաֆայել Լեաուի («Միլան»)` կատալոնական ակումբ հավանական տեղափոխությունների մասին է։

Այդուհանդերձ, աղբյուրի փոխանցմամբ` Լապորտան ու Մենդեշը քննարկել են նաև Ռոնալդուի ապագայի հարցը։

Նշվում է, որ Լապորտան պատրաստ է պայմանագիր առաջարկել 37-ամյա ֆուտբոլիստին ու հետաքրքրված է նրա ծառայություններով։

«Կապտանռնագույնների» նախագահը դեռևս նախորդ ամռանն է փորձել գնել պորտուգալացի գոլահարին, սակայն ֆինանսական խնդիրների պատճառով ստիպված է եղել հրաժարվել այդ մտքից։

Հաղորդվում է, որ Ռոնալդուի նկատմամբ հետաքրքրվածությամբ «Բարսելոնան» փորձում է լուծել նաև «Բավարիայի» հարձակվող Ռոբերտ Լևանդովսկիի տրանսֆերի հարցը։

«Բլաուգրանայի» ղեկավարությունը հուսով է, որ Ռոնալդուի «Բարսելոնա» հնարավոր տեղափոխության մասին տեղեկատվությունը ճնշում կգործադրի նաև «Բավարիայի» վրա, որը հրաժարվում է ընդունել «Բարսելոնայի» առաջարկները լեհ ֆուտբոլիստի տեղափոխության վերաբերյալ։

Ավելի վաղ հայտնի էր դարձել, որ Կրիշտիանու Ռոնալդուն «Մանչեսթեր Յունայթեդի» ղեկավարության հետ հանդիպման ժամանակ նշել է, որ ցանկանում է հեռանալ ակումբից։

Հիշեցնենք, որ 2021 թ. ամռանը պորտուգալացի ֆուտբոլիստը 12 տարի անց վերադարձավ մանկունյական ակումբի շարքեր, որի կազմում 2021/22 մրցաշրջանում անցկացրած 38 խաղում դարձավ 24 գոլի և 3 գոլային փոխանցման հեդինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2022