ՖԻՖԱ-ի նախկին նախագահ Բլատեր. «Ես իսկական հրեշ եմ ստեղծել»

ՖԻՖԱ-ի նախագահ Զեպ Բլատերը խոսել է ժամանակակից ֆուտբոլի մասին.

«Ինձ նախորդած Ժոաո Ավելանժը Հարավաֆրիկյան Հանրապետությունում կայացած աշխարհի առաջնությունից հետո ինձ ասաց, որ ես իսկական հրեշ եմ ստեղծել։ Այդ ժամանակ ՖԻՖԱ-ն առաջին անգամ մեծ շահույթ ունեցավ։

Եվ նա ճիշտ էր։ Ես, իրոք, հրեշ եմ ստեղծել։ ՖԻՖԱ-ն աղքատ կազմակերպություն էր, երբ 1975 թ. զբաղեցրի զարգացման գծով տնօրենի պաշտոնը։ Adidas-ի նման հովանավորները գումար չէին վճարում մեզ։ Առաջին լուրջ հովանավորչական պայմանագիրը ՖԻՖԱ-ն կնքել է 1976 թ. Coca-Cola-ի հետ։

Այնուհետև ի հայտ եկան հանրային հեռուստաընկերությունները, որոնք անմիջապես թույլ տվեցին գովազդը։ Ֆուտբոլը հեռուստատեսության համար դարձավ գերարտադրանք, սուպեր շոու, որը կարելի էր մեծ գումարով վաճառել։ Առաջին աշխարհի առաջնությունը, որը մեծ շահույթ ապահովեց ՖԻՖԱ-ի համար, ՀԱՀ-2010-ն էր։

Երբ 2016 թ. Ջիանի Ինֆանտինոն դարձավ նախագահ, հայտնվեց մի մեծ բնում, քանի որ փողի մեքենան անխափան աշխատում է։ Այժմ այն ավելի ու ավելի է արագացնում։

Այժմ մենք ականատես ենք լինում ֆուտբոլային վաճառքի։ Օրինակ վերցնենք եվրագավաթային ՈՒԵՖԱ-ն։ Ինչ-որ ժամանակ գործում էր Եվրոպական չեմպիոնների գավաթը, Գավաթակիրների գավաթը, Տոնավաճառների գավաթը։ Այժմ գործում է 36 ակումբներից կազմված Չեմպիոնների լիգան, Եվրոպա լիգան ու Կոնֆերենցիաների լիգան։ Չմոռանանք նաև Ազգերի լիգան։

Հաջորդ աշխարհի առաջնությանն էլ մասնակցելու է 48 հավաքական։ Դա ՖԻՖԱ-ի անդամ-երկրների գրեթե մեկ քառորդն է։ 2025 թվականին էլ աշխարհի ակումբային առաջնությունն անցկացվելու է 32 ակումբով։

Բոլորն այժմ ծափահարում են, քանի որ կա շատ փող, բայց այս գերհագեցվածությունը հանգեցնում է ֆուտբոլի նկատմամբ հետաքրքրության կորստի։ Ես դա նկատում եմ նաև իմ մոտ»,- Բլատերի խոսքը մեջբերում է Watson-ը։

Զեպ Բլատերը ՖԻՖԱ-ի նախագահի պաշտոնը զբաղեցրել է 1998-2015 թթ.։ 2015 թ. հունիսի 2-ին կոռուպցիոն սկանդալի պատճառով շվեյցարացի ֆունկցիոները լքել է զբաղեցրած պաշտոնը։ Այդ տարվա դեկտեմբերի 21-ին ՖԻՖԱ-ի էթիկայի կոմիտեի արբիտրաժային պալատը Բլատերին 8 տարով զրկել է ֆուտբոլային ցանկացած գործունեությունից։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից