«Նույն կիրքը»․ Ռեալի կանանց թիմի ֆուտբոլիստուհին «պայթեցրել» է Twitter-ը

Չեմպիոնների լիգայի 1/4 եզրափակչի առաջին խաղում «Ռեալ Մադրիդը» սեփական հարկի տակ 3։1 հաշվով վստահ հաղթանակ տարավ «Լիվերպուլի» նկատմամբ։

Խաղից հետո «Ռեալի» կանանց թիմի դարպասապահ Մարիա Իզաբել Ռոդրիգեսը կամ պարզապես Միսան Twitter-ի իր օգտահաշվում երկու լուսանկարից և երկտողից բաղկացած գրառում կատարեց․ լուսանկարներից մեկում Մարկո Ասենսիոն է, ով տոնում է մերսիսայդյան ակումբի դարպասն ուղարկած իր գոլը, իսկ մյուս լուսանկարում՝ Միսան է՝ տոնելով իր թիմի հաջողություններից մեկը։

Դարպասապահը գրառմանը կցել է նաև հետևյալ երկտողը․

«Նույն կիրքը»։

Մարիա Իզաբելը Twitter-ի այլ օգտատերերի կողմից ստանում էր բազմաթիվ կարծրատիպային մեկնաբանություններ, ինչի պատճառով ստիպված էր հեռացնել այդ գրառումը:

Մասնավորապես նա հիմնականում ստանում էր հետևյալ բովանդակությամբ մեկնաբանություններ․

«Աստված իմ, պարզապես հիմարություն է կանանց ֆուտբոլը համեմատել տղամարդկանց խաղի հետ»։

Այդ ամենից հետո օգնության հասավ անձամբ Մարկո Ասենսիոն։ 25-ամյա ֆուտբոլիստը Twitter-ի իր օգտահաշվում նմանատիպ լուսանկարներով գրառում կատարեց՝ գրելով․

«Նույն կիրքը։ Թող ոչ ոք երբեք ձեզ չխանգարի ասել և արտահայտել այն, ինչ ցանկանում եք»։

Ասենսիոյի այդ գրառումը «վարակեց» «Ռեալի» ներկա ու նախկին մի շարք ֆուտբոլիստների։ Իրենց օգտահաշիվներում գրառումներ կատարեցին Մարսելոն, Դանի Կարվախալը, Լուկաս Վասկեսը և Էստեբան Գրաներոն։

Այդ ամենը վերածվեց ֆլեշմոբի և Մարիա Իզաբելին սկսեցին աջակցել նույնիսկ տարբեր ակումբներ։

Ֆլեշմոբին միացան «Լևանտեն», «Լեգանեսը», «Էլչեն», «Վիլյառեալը», «Ատլետիկոն»։

Հատկանշական է, որ Միսան իր պրոֆեսիոնալ կարիերան սկսել է հենց «Ատլետիկոյի» կազմում։

Այդ ֆլեշմոբը դուրս է եկել նաև Իսպանիայի սահմաններից, որին միացել են «Տոտենհեմը», «Այնտրախտը», «Բենֆիկան» և Արգենտինայի հավաքականը։

Ամենահետաքրքիրն այն է, որ ֆլեշմոբին միացել է նաև «Բարսելոնան», որը գրառումը կատարելիս օգտագործել է Լեո Մեսսիի և կանանց թիմի ֆուտբոլիստ Մարիոն Կալդենտեի լուսանկարները։

Մարիա Իզաբել Ռոդրիգեսը հայտնվել է նաև իսպանական հեղինակավոր Marca պարբերականի ապրիլի 8-ի համարի առաջին էջում։

Ինչ վերաբերում է Միսային, ապա նա վերականգնել է արդեն իր գրառումը՝ գրելով հետևյալը․

«Ի սրտե շնորհակալ եմ բոլորից

#MismaPasion (խմբ․՝ հայերեն – Նույն կիքրը)։

Գրառումն արդեն հավաքել է 101 հազար like և 10 հազարից ավել retweet:

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am