Պաշտոնական․ Մաուրո Իկարդին՝ ՊՍԺ-ի լիիրավ ֆուտբոլիստ
Ինչպես տեղեկացնում է «Պարիս Սեն-Ժերմենի» պաշտոնական կայքը, փարիզյան ակումբը ձեռք է բերել Մաուրո Իկարդիի ամբողջական տրանսֆերը, ով վարձավճարով էր հանդես գալիս ակումբի կազմում։
Աղբյուրի փոխանցմամբ՝ գործարքն արժեցել է 50 մլն եվրո․ ևս 8 մլն եվրո միլանյան ակումբը կստանա բոնուսների տեսքով։ Արգենտինացի ֆուտբոլիստը փարիզյան ակումբի հետ պայմանագիր է կնքել մինչև 2024 թվականը, իսկ աշխատավարձը տարեկան կկազմի 8 մլն եվրո։ Նշվում է, որ եթե հետագայում ՊՍԺ-ն Իկարդիի տրանսֆերը վաճառի որևէ իտալական ակումբի, «Ինտերը» կվաստակի ևս 10 մլն եվրո։
Ընթացիկ մրցաշրջանում 27-ամյա ֆուտբոլիստը փարիզյան ակումբի կազմում մասնակցել է 31 հանդիպման՝ դառնալով 20 գոլի հեղինակ։ Իկարդին «Ինտերի» կազմում հանդես է եկել 2013-19 թթ․։ Այդ ընթացքում արգենտինացի հարձակվողը մասնակցել է 219 հանդիպման՝ դառնալով 124 գոլի հեղինակ։