Նեյմարը մոտ է ակումբը փոխելուն

Սաուդյան Արաբիան ներկայացնող «Ալ Հիլալի» վինգեր Նեյմարը մոտ է «Սանթոս» վերադառնալուն, գրում է ինսայդեր Ֆաբրիցիո Ռոմանոն։

Ըստ աղբյուրի` բրազիլական ակումբը 32-ամյա ֆուտբոլիստի համար մղվող պայքարում առաջ է անցել ՄԼՍ-ը ներկայացնող «Չիկագո Ֆայրից» և պատրաստ է վարձակալել նրան։ Այդ հարցում «Սանթոսն» առաջարկ է արել «Ալ Հիլալին» և սպասում է սաուդյան ակումբի վերջնական որոշմանը։

Գործարքն իրականացնելու համար «Սանթոսի» միակ խոչընդոտը եզրային հարձակվողի աշխատավարձն է։ Նա «Ալ Հիլալում» տարեկան վաստակում է 100 միլիոն եվրո։ Բացի այդ, ֆուտբոլիստը մինչև 2025 թ. հունիսի 30-ը գործող պայմանագիր ունի Էր Ռիյադը ներկայացնող ակումբի հետ։

Այդուհանդերձ, Նեյմարի տեղափոխությանը կխթանի նաև այն, որ վերջինս չի ընդգրկվելու «Ալ Հիլալի»` Սաուդյան Արաբիայի Պրո լիգայի ընթացիկ մրցաշրջանի երկրորդ շրջանի հայտացուցակում։

«Նեյմարը չի գրանցվելու, բայց նա կարող է մասնակցել Ասիայի Չեմպիոնների լիգային։ Նա համաշխարհային մակարդակի ֆուտբոլիստ է, բայց ֆիզիկապես այլևս չի կարող ցույց տալ այն խաղը, որը նրանից ակնկալում ենք»,- նշել է ակումբի գլխավոր մարզիչ Ժորժե Ժեսուսը, որի խոսքը մեջբերում է Ռոմանոն։

Նեյմարը 2023 թ. հոկտեմբերին ԱԱ-2026-ի որակավորման փուլի Հարավային Ամերիկայի գոտու Ուրուգվայի դեմ խաղում (0-2) ծանր վնասվածք է ստացել և խաղադաշտ վերադարձել միայն մեկ տարի անց։ Նա նախորդ տարի նոյեմբերին մկանային վնասվածք է ստացել ու անորոշ ժամանակով դուրս մնացել շարքից։

Հիշեցնենք, որ բրազիլացի ֆուտբոլիստը «Սանթոսի» սան է։ Նա ակումբի համակարգում հանդես է եկել 2003-2013 թթ., 225 խաղում խփել 136 գոլ, կատարել 64 ասիստ։ Նեյմարն «Ալ Հիլալ» է տեղափոխվել 2023 թ. օգոստոսին, մասնակցել միայն 7 հանդիպման, մրցակցիների դարպասը գրավել 1 անգամ, խաղընկերներին կատարել 3 արդյունավետ փոխանցում։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից