Հայաստանի հավաքականն առաջին մարզումն է անցկացրել Շվեյցարիարում

Ինչպես գիտեք, Հայաստանի հավաքականը մեկնել է Շվեյցարիա՝ Սեն Գալեն քաղաք՝ պատրաստվելու մարտի 25-ին աշխարհի 2022 թ․ առաջնության որակավորման փուլի 1-ին տուրի Լիխտենշտեյնի դեմ հանդիպմանը։

Ինչպես տեղեկացնում է Հայաստնաի ֆուտբոլի ֆեդերացիայի պաշտոնական կայքը, մեր հավաքականը Խոակին Կապառոսի գլխավորությամբ մարտի 22-ին Շվեյցարիայում անցկացրել է իր առաջին մարզումը, որը տեղի է ունեցել Ուցվիլ քաղաքի մարզումային համալիրում։

Աղբյուրի փոխանցմամբ՝ հավաքականի մարզմանը մասնակցել է 25 ֆուտբոլիստ։ Չվերթների ուշացման պատճառով Գևորգ Ղազարյանը և Հովհաննես Համբարձումյանը չէին հասցրել ժամանել Սեն Գալեն մինչ մարզումը:

Բոլոր ֆուտբոլիստները, բացի Վբեյմար Անգուլոյից, Նորբերտո Բրիասկո Բալեկյանից և Հակոբ Հակոբյանից մարզման մի մասն անցկացրել են անհատական ծրագրով՝ ֆիզպատրաստության մարզիչ Խավիեր Մինյանոյի և ֆիզիոթերապևտ Պաբլո Լյանեսի վերահսկողությամբ։

Հակոբ Հակոբյանը և Վբեյմար Անգուլոն մի քանի օր առաջ են ապաքինվել վնասվածքից, իսկ Նորբերտո Բրիասկո Բալեկյանը երկարատև թռիչքից հետո մարզվում էր ավելի խնայողական ռեժիմով:

Մարզումից հետո կայացած երկկողմանի հանդիպման ժամանակ մի շարք ֆուտբոլիստներ փորձարկվեցին տարբեր դիրքերում, մարզիչները դիտարկեցին տակտիկական տարբեր սխեմաներ:

Մարտի 23-ին Հայաստանի ազգային հավաքականը կանցկացնի ևս մեկ մարզում Ուցվիլի խաղադաշտում: 

Հիշեցնենք, որ Լիխտենշտեյն – Հայաստան հանդիպումը կայանալու է Վադուցում՝ «Ռեյնպարկ» մարզադաշտում՝ Երևանի ժամանակով 23։45-ից սկսած։

Հ․Գ․ Տեսանյութը՝ ՀՖՖ մամուլի ծառայության․