Անտոնիո Կոնտեն անանուն սպառնալիքներ է ստացել

Ինչպես տեղեկացնում է իտալական Corriere della Sera-ն՝ Միլանի «Ինտերի» գլխավոր մարզիչ Անտոնիո Կոնտեն անանուն նամակով սպառնալիքներ և փամփուշտ է ստացել։ Իտալիայում սա քաղաքական գործիչներին վախեցնելու հայտնի մեթոդ է։

Իրավապահ մարմիններն արդեն հետաքննություն են սկսել դեպքի առթիվ և Կոնտեին խոստացել են թիկնապահներ տրամադրել՝ տունը և մարզաբազան հսկելու համար։ Իշխանությունները ցանկանում են լրջորեն զբաղվել կատարվածով, չնայած նրան, որ ըստ պարբերականի, մարզչին ուղարկված նամակը չար կատակ է եղել։

Ավելի վաղ «Յուվենտուսի» երկրպագուներն իրենց դժգոհությունն էին հայտնել, որ թուրինցիների նախկին խաղացողն ու մարզիչը համալրել է սկզբունքային մրցակցի ճամբարը։