News.am sport. «Հավաքականը ևս մեկ այլազգի նորեկ կունենա»
Ինչպես տեղեկացնում է News.am sport-ը, Հայաստանի հավաքականի նորանշանակ գլխավոր մարզիչ Խոակին Կապարոսը շարունակում է ուղիներ փնտրել ազգային հավաքականն ուժեղացնելու համար։
Աղբյուրի փոխանցմամբ՝ հավաքական է հրավիրվելու հայկական արմատներ ունեցող արգենտինացի հարձակվողական ոճի կիսապաշտպան Լուկաս Սելարայանը: Սելարայանը հիմնականում հանդես է գալիս փլեյմեյքերի դիրքում։
Նշվում է, որ իսպանացի մասնագետը մի շարք զրույցներ է ունեցել Սելարայանի հետ, ով հունվարին համալրել է ամերիկյան ՄԼՍ-ը ներկայացնող «Կոլամբուս Քրյու» ակումբը և արդեն բացել է իր գոլերի հաշիվը նոր ակումբի կազմում։
Հայտնի է, որ Սելարայանի տրանսֆերը ամերիկյան ակումբի համար արժեցել է 7 մլն եվրո, ինչը տրանսֆերային ռեկորդ է «Կոլամբուս Քրյուի» համար։
Սելարայանն այժմ 27 տարեկան, կարիերան սկսել է Արգենտինան ներկայացնող «Բելգրանոյի» կազմում, իսկ 2016 թվականին 5 մլն եվրոյի դիմաց տեղափոխվեց մեքսիսկական «Տիգրես», որի կազմու երկու անգամ դարձել է Մեքսիկայի չեմպիոն։ Սելարայանը կարիերայի ողջ ընթացքում մասնակցել է 219 պաշտոնական հանդիպման՝ դառնալով 34 գոլի և 20 գոլային փոխանցման հեղինակ։ Նշենք նաև, որ ըստ transfermarkt.com պորտալի, այժմ Լուկաս Սելարայանի տրանսֆերը գնահատվում է 4,8 մլն եվրո։