17-ամյա Էնդրիկը 90+6-րդ րոպեին թրիլերային հաղթանակ պարգևեց Բրազիլիային 🎥

Բրազիլիայի հավաքականը Կոպա Ամերիկա-2024-ի մեկնարկից առաջ անցկացրեց առաջին ընկերական հանդիպումը և ԱՄՆ-ի Տեխաս նահանգի Քոլեջ Սթեյշն քաղաքում մրցեց Մեքսիկայի դեմ։

Հանդիպումը թրիլերային ընթացք ու ավարտ ունեցավ, որն ավարտվեց «պենտակամպիոնների» հաղթանակով` 3:2 հաշվով։

Բրազիլացիներն Անդրեաս Պերեյրայի ու Գաբրիել Մարտինելիի գոլերի շնորհիվ 54-րդ րոպեի դրությամբ հաղթում էին 2:0 հաշվով, սակայն «մայաները» կարողացան հետ բերել կորցրածը։

Մեքսիկացիներից 73-րդ րոպեին աչքի ընկավ Խուլիան Քինյոնեսը, իսկ 90+2-րդ րոպեին` Գիլերմո Մարտինեսը։

Թվում էր` Խայմե Լոսանոյի թիմը ոչ-ոքի կորզեց, սակայն այդ սցենարի հետ համաձայն չէին Մադրիդի «Ռեալի» վինգեր Վինիսիուսն ու նրա ապագա ակումբակից Էնդրիկը։

90+6-րդ րոպեին Վինիսիուսի փոխանցումից հետո 17-ամյա Էնդրիկը գլխի դիպում հարվածով դրամատիկ հաղթանակ պարգևեց Դորիվալ Ժունիորի թիմին։

Հավելենք, որ Բրազիլիան հաջորդ ընկերական հանդիպումը կանցկացնի հունիսի 13-ին և Օռլանդոյում կհյուրընկալվի ԱՄՆ-ին։

Մեքսիկան Կոպա Ամերիկայի մեկնարկից առաջ վերջին ընկերական հանդիպումն անցկացրեց։ «Կանաչները» մրցաշարի առաջին տուրում հունիսի 23-ին մրցելու են Ճամայկայի դեմ։ Ամերիկայի գավաթի խաղարկության B խմբում մեքսիկացիները հանդիպելու են նաև Էկվադորին ու Վենեսուելային։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am