Ֆանտաստիկ թրիլեր Մադրիդում! «Ռեալը» անհավանական պայքարում դուրս եկավ գավաթի եզրափակիչ 🎥

Իսպանիայի գավաթի խաղարկության կիսաեզրափակիչի պատասխան խաղում Մադրիդի «Ռեալը» տանը մրցեց «Ռեալ Սոսիեդադի» դեմ։

Հիշեցնենք, որ դիմակայության առաջին խաղում «արքայական» ակումբը հաղթել էր 1:0 հաշվով։

Պատասխան խաղում անհավանական պայքար ծավալվեց։

Առաջին խաղակեսում կողմերը մեկական գոլով փոխանակվեցին. 16-րդ րոպեին բասկյան թիմին առաջ մղեց Անդեր Բարենեչեան, որին «արքայական» ակումբը 30-րդ րոպեին պատասխանեց Էնդրիկի դիպուկ հարվածով։

72-րդ րոպեին Դավիդ Ալաբայի ինքնագոլի շնորհիվ հյուրերը կրկին առաջ անցան հաշվի մեջ, իսկ 80-րդ րոպեին Միկել Օյարսաբալը խփեց իր թիմի երրորդ գոլը։

Թվում էր, թե «Ռեալ Սոսիեդադը» վճռեց դիմակայության ելքը, սակայն Կառլո Անչելոտիի գլխավորած թիմը շատ արագ ոչ միայն կրճատեց, այլև հավասարեցրեց հաշիվը. 82-րդ րոպեին աչքի ընկավ Ջուդ Բելինգեմը, 86-րդ րոպեին` Օրելյեն Չուամենին։

Այդուհանդերձ, սա էլ վերջը չէր, քանի որ 90+3-րդ րոպեին Օյարսաբալը գլխի հարվածով դուբլ գրանցեց, հիմնական ժամանակում հյուրերին 4:3 հաշվով հաղթանակ պարգևեց, իսկ դիմակայությունը շարունակվեց լրացուցիչ ժամանակում։

Լրացուցիչ ժամանակում «Ռեալը» վերահսկում էր հանդիպման ընթացքն ու 115-րդ րոպեին փոխարինման դուրս եկած Անտոնիո Ռյուդիգերը խփեց մրցակցի դիմադրությունը կոտրող գոլն ու դրեց հանդիպման վերջակետը` 4:4։

«Լոս բլանկոսն» ընդհանուր դիմակայությունում հաղթեց 5:4 հաշվով և դուրս եկավ եզրափակիչ, որտեղ կմրցի «Ատլետիկո Մադրիդ» – «Բարսելոնա» դիմակայության հաղթողի դեմ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից