Վրաստանի Մ-21 հավաքականը նվաճել է Եվրո-2025-ի խմբային փուլի ուղեգիր 🎥
Վրաստանի Մ-21 տարեկանների հավաքականը նվաճել է Եվրոպայի 2025 թ. երիտասարդական առաջնության խմբային փուլի ուղեգիր։
Վրացիները որակավորման փուլում ընդգրկված էին C խմբում, 10 խաղում վաստակել են 19 միավոր, գրավել երկրորդ տեղն ու հնարավորություն ստացել մասնակցելու անցումային փլեյ-օֆֆ-ին։
Անցումային փլեյ-օֆֆ-ում Ռամազ Սվանաձեի սաները մրցել են Խորվաթիայի Մ-21 հավաքականի դեմ։ Դիմակայության առաջին խաղում Վրաստանը Թբիլիսում կայացած խաղում ինքնագոլի շնորհիվ հաղթել է 1:0 հաշվով։
Պատասխան խաղում խորվաթները գերլարված պայքարում կարողացան 90+2-րդ րոպեին 3:2 հաշվով հաղթանակ կորզել։ Տանտերերից դուբլ գրանցեց Վիեննայի «Ռապիդի» հարձակցող Դիոն Բելյոն, որը վերջերս իր ակումբի կազմում Կոնֆերենցիաների լիգայի հիմնական փուլի երրորդ խաղում հաղթական գոլ էր խփել նաև Հայաստանի փոխչեմպիոն «Նոայի» դեմ խաղում (1:0)։
Գոլառատ խաղում հյուրերից աչքի ընկան Լուկա Գագնիձեն ու Նոդար Լոմինաձեն։
Կողմերը լրացուցիչ ժամանակում գոլեր չխփեցին, հաղթողին պարզեցին հետխաղյա 11-մետրանոցների միջոցով։
Առաջին իսկ հարվածով վրիպեց վրացիների առաջատարներից Իրակլի Ազարովը։ Խորվաթիան կարող էր ամեն ինչ ավարտել իր 5-րդ հարվածի ժամանակ, սակայն Բաթումիի «Դինամոյի» դարպասապահ Լուկա Խարատիշվիլին հետ մղեց Կազանի «Ռուբինի» կիսապաշտպան Վելդին Հոջայի հարվածը։
Հետագայում Խարատիշվիլին հետ մղեց նաև ռումինական «Ունիվերսիտատիա Կռայովայի» պաշտպան Յուրայ Բադելի իրացրած 11-մետրանոցն ու պատմական հաղթանակ պարգևեց Վրաստանին։
Այսպիսով, Վրաստանի Մ-21 հավաքականը երկրորդ անգամ անընդմեջ հանդես կգա Եվրոպայի երիտասարդական առաջնության խմբային փուլում։ Մրցաշարը կայանալու է Սլովակիայում 2025 թ. հունիսի 12-ից հուլիսի 5-ը։ Եվրոպայի Մ-21 գործող չեմպիոնն Անգլիան է։
Հ․Գ․ միացե՛ք Interfootball-ի Telegram-ի ալիքին https://t.me/Interfootball_am
Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից