Սելարայանի` Բելգրանո տեղափոխությունը դեռ չի կայացել

Օրեր առաջ Արգենտինայի Լիգա Պրոֆեսիոնալում հանդես եկող «Բելգրանոն» հայտարարեց, որ պայմանագիր է կնքել Սաուդյան Արաբիան ներկայացնող «Ալ Ֆաթեհի» և Հայաստանի ազգային հավաքականի կիսապաշտպան Լուկաս Սելարայանին։

Այդուհանդերձ, Կորդովա քաղաքը ներկայացնող ակումբը սոցիալական բոլոր հարթակներից և պաշտոնական կայքից հեռացրել է տրանսֆերը հաստատող հաղորդագրությունն ու լուսանկարները. 32-ամյա ֆուտբոլիստի տեղափոխությունը դեռ չի կայացել։

«Բելգրանոն» հանդես է եկել պաշտոնական հայտարարությամբ.

«Ստիպված ենք հետաձգել Սելարայանի շնորհանդեսը, քանի որ մի շարք գործընթացներ են տեղի ունենում Սաուդյան Արաբիայի սպորտի նախարարությունում։

Չնայած ակումբների և ֆուտբոլիստի միջև կա համաձայնություն, պետք է ամեն ինչ համապատասխանեցվի նաև իրավական ասպեկտներով։ Ակումբը փորձում է հնարավորինս արագ կարգավորել խնդիրը, որպեսզի ֆուտբոլիստի շնորհանդեսի նոր օր նշանակի»,- հայտարարությունը մեջբերում է ակումբի մամուլի ծառայությունը։

Ըստ նախնական տեղեկությունների` «Ալ Ֆաթեհը» տրանսֆերի իրականացման համար անհրաժեշտ բոլոր փաստաթղթերը չի ուղարկել համապատասխան կառույցին, ինչի հետևանքով ՖԻՖԱ-ն այն պաշտոնապես չի հաստատել։

Ավելի վաղ հաղորդվում էր, որ Սելարայանը սեփական միջոցներով գնել է «Ալ Ֆաթեհի» հետ գործող պայմանագիրն ու խզել այն, ինչի շնորհիվ էլ հնարավոր է եղել իրականացնել գործարքը։

Սելարայանը «Բելգրանոյի» սան է, որի համակարգում հանդես է եկել 2012-2016 թվականներին, 81 խաղում խփել 10 գոլ, կատարել 6 ասիստ։ Նա «Ալ Ֆաթեհ» էր տեղափոխվել 2023 թ. ամռանը, մասնակցել 43 հանդիպման` դառնալով 9 գոլի ու 11 գոլային փոխանցման հեղինակ։

«Բելգրանոն» Արգենտինայի ավարտված առաջնությունում 27 խաղում վաստակել է 35 միավոր և 28ակումբների միջև պայքարում զբաղեցրել 16-րդ տեղը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից