Ռեալը մի շարք գրանդ ակումբերի հետ կպայքարի Սպորտինգի երիտասարդ տաղանդի համար

Եվրոպական մի շարք հեղինակավոր ակումբներ հետաքրքրված են պորտուգալական «Սպորտինգի» 18-ամյա եզրային պաշտպան Նունու Մենդեշի ծառայություններով։

Տարեվերջին լիսաբոնյան ակումբը նոր պայմանագիր կնքեց խոստումնալից ֆուտբելիստի հետ, որի հրաժարագինը կազմել է 70 մլն եվրո։ Պայմանագիրը կգործի մինչև 2024/25 մրցաշրջանի ավարտը։

Մադրիդի «Ռեալը» դիտարկում է Մենդեշին՝ որպես Մարսելոյի փոխարինողի։ Վերջինիս պայմանագիրը «արքայական» ակումբի հետ ավարտվում է 2022 թվականի ամռանը, սակայն բացառված չէ, որ բրազիլացին կարող է լքել ակումբը այս մրցաշրջանի ավարտին։

Ինչպես նշում է As-ը, «Ռեալից» բացի ֆուտբոլիստի համար կպայքարեն նաև մի շարք այլ գրանդ ակումբներ, ինչպիսիք են՝ «Յուվենտուսը», «Լիվերպուլը», «Մանչեսթեր Յունայթեդը», «Ինտերն» ու «ՊՍԺ»-ն։

Պորտուգալացի երիտասարդ տաղանդը «Սպորտինգի» կազմում ընթացիկ մրցաշրջանում մասնակցել է 10 հանդիպման՝ դառնալով 1 գոլի հեղինակ։