Ռաֆայել Վարանը կարիերան շարունակելու է Իտալիայում

Մադրիդի «Ռեալի» ու «Մանչեսթեր Յունայթեդի» նախկին պաշտպան Ռաֆայել Վարանը տեղափոխվելու է իտալական Ա սերիայի նորեկ «Կոմո»։

Ինսայդեր Ֆաբրիցիո Ռոմանոն հայտնում է, որ ակումբը մինչև 2026 թ. հունիսի 30-ը պայմանագիր է համաձայնեցրել 31-ամյա ֆուտբոլիստի հետ։ Համաձայնագիրն ունենալու է ևս մեկ տարով երկարաձգելու հնարավորություն։

Ֆրանսիացի ֆուտբոլիստը «Կոմոյի» կազմ է տեղափոխվելու ազատ գործակալի կարգավիճակում։ Նա վերջերս է հեռացել «Մանչեսթեր Յունայթեդից», որտեղ հանդես էր գալիս 2021 թ. հուլիսից։

Պաշտպանը 2011-2021 թթ. հանդես է եկել նաև «Ռեալում»` 360 խաղում դառնալով 17 գոլի ու 7 գոլային փոխանցման հեղինակ։ Վարանը Ֆրանսիայի հավաքականի կազմում դարձել է աշխարհի չեմպիոն ու Ազգերի լիգայի գավաթի խաղարկության հաղթող։

Հիշեցնենք, որ «Կոմոն» մարզում է իսպանացի անվանի նախկին ֆուտբոլիստ Սեսկ Ֆաբրեգասը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am