Ռաուլը, հնարավոր է, գլխավորի Լա լիգան ներկայացնող ակումբը

Ռաուլը, հնարավոր է, գլխավորի Լա լիգան ներկայացնող ակումբը

07/06/2023 - 12:45

«Խետաֆեում», հնարավոր է, շուտով մարզչական փոփոխություն տեղի ունենա։

Բանն այն է, ինչպես հայտնում է Marca-ն, «Խետաֆեի» գլխավոր մարզիչ Պեպե Բորդալասը մտադիր է չերկարաձգել պայմանագիրն ակումբի հետ, որն ավարտվում է սույն թվականի հունիսի 30-ին։

59-ամյա մասնագետը Լա լիգայի 2022/23 մրցաշրջանի ավարտից 7 տուր առաջ գլխավորեց «Խետաֆեն» և ակումբին օգնեց առաջնությունն ավարտել 15-րդ հորիզոնականում` պահպանելով տեղն ուժեղագույնների խմբում։

Աղբյուրի փոխանցմամբ` «ազուլոնեսի» նախագահ Անխել Տորեսը ցանկանում է, որ Բորդալասը շարունակի մնալ պաշտոնում, սակայն վերջինս մտադիր է ընդմիջում վերցնել, հանգստանալ առաջնության լարված վերջաբանից ու դիտարկել նաև այլ առաջարկներ։

Հաղորդվում է, որ Բորդալասի ամենահավանական փոխարինողը «Ռեալ Մադրիդի» երիտասարդական թիմի` «Կաստիլիայի» գլխավոր մարզիչ Ռաուլն է։

Սպասվում է, որ ընթացիկ մրցաշրջանի ավարտից հետո Ռաուլը կլքի «Ռեալի» համակարգը, քանի որ ցանկանում է ավելի բարձր մակարդակում փորձել ուժերը։

45-ամյա մասնագետի գլխավորությամբ «Կաստիլիան» Սեգունդա Բ-ի (խմբ.` նշանակությամբ Իսպանիայի երրորդ դիվիզիոնը) 2022/23 մրցաշրջանում առաջին ենթախմբում զբաղեցրեց 3-րդ հորիզոնականը, ինչն ակումբին թույլ տվեց դուրս գալ փլեյ-օֆֆ փուլ ու պայքարել Սեգունդայի ուղեգրի համար։

Այդուհանդերձ, ակումբը փլեյ-օֆֆ-ի առաջին խաղում հյուրընկալվելիս 2:4 հաշվով պարտվել է «Բարսելոնա Բ»-ին և պատասխան խաղից առաջ հայտնվել բարդ իրավիճակում։

Հավելենք, որ Ռաուլը «Կաստիլիան» մարզում է 2019 թ. հուլիսից։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2023