Ռամին` Մարտինեսի մասին. «Ֆուտբոլային աշխարհի ամենամեծ ապուշը»📸

Ֆրանսիայի հավաքականի նախկին պաշտպան Ադիլ Ռամին կտրուկ քննադատել է Արգենտինայի հավաքականի դարպասապահ Էմիլիամո Մարտինեսի վարքագիծն աշխարհի չեմպիոն դառնալուց հետո.

«Ֆուտբոլային աշպարհի ամենամեծ ապուշն ու անհասկանալի մարդը»,- 36-ամյա պաշտպանն Instagram-ի stories բաժնում գրել է Մարտինեսի մասին։

Բացի դրանից, Ռամին մեկ այլ story-ի միջոցով հասկացրել է, որ իր համար ԱԱ-2022-ի լավագույն դարպասապահը Յասին Բունուն է (Մարոկկո), ոչ թե Էմիլիանո Մարտինեսը.

«Նա է հենց ԱԱ-2022-ի «ոսկե ձեռնոցը»»,- գրել է Ռամին` հրապարակելով Բունուի լուսանկարը։

Հիշեցնենք, որ ԱԱ-2022-ի լավագույն դարպասապահ է ճանաչվել Էմիլիանո Մարտինեսն, ով մրցանակն ստանալուց հետո անվայելուչ ժեստ է ցույց տվել։

Հետագայում նա իր այդ քայլը բացատրել է հետևյալ կերպ.

«Դա արել եմ այն պատճառով, քանի որ ֆրանսիացիներն ինձ սուլում էին։ Այդպիսի մեծամտությունն իմ պարագայում չի աշխատում»։

Հատկանշական է, որ Մարտինեսի` ֆրանսիացիներից «վրեժ լուծելու» գործընթացն այդքանով չավարտվեց։

30-ամյա դարպասապահը հանդերձարանում թիմակիցների հետ հաջողությունը նշելիս Ֆրանսիայի հավաքականի հարձակվող Կիլիան Մբապեի համար հայտարարել է «լռության րոպե», իսկ Բուենոս Այրեսում կայացած տոնական շքերթի ժամանակ երկրպագուներին ցույց է տվել 24-ամյա հարձակվողի արտաքինով տիկնիկ։

Հիշեցնենք, որ Ադիլ Ռամին 2018 թ. Ֆրանսիայի հավաքականի կազմում դարձել է աշխարհի չեմպիոն։ Նա «եռագույնների» կազմում անցկացրել է 38 հանդիպում` դառնալով 1 գոլի հեղինակ։

36-ամյա պաշտպանն այժմ հանդես է գալիս Լիգա 1-ը ներկայացնող «Տրուայի» կազմում` ընթացիկ մրցաշրջանում դաշտ դուրս գալով 7 անգամ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am