Պաշտոնական. ՈՒԵՖԱ-ն փոխել է ՉԼ եզրափակիչի մեկնարկի ժամը
Չեմպիոնների լիգայի եզրափակիչները 2025/26 մրցաշրջանից սկսած կմեկնարկեն սովորականից 3 ժամ շուտ, հայտնում է ՈՒԵՖԱ-ի պաշտոնական կայքը։
«Ականջավոր» գավաթի համար վճռորոշ հանդիպումը Կենտրոնական Եվրոպայի ժամանակով կմեկնարկի 18:00-ին, Երևանի ժամանակով` 20:00-ին։
«Այս որոշումն ուղղված է լոգիստիկայի ու կազմակերպչական գործընթացների օպտիմալացման միջոցով բարելավել երկրպագուների, թիմերի և ընդունող քաղաքների համար խաղի օրվա ընդհանուր տպավորությունը՝ ապահովելով մի շարք շոշափելի առավելություններ։
Մեր նպատակն է խաղի օրը դարձնել հաճելի այն մարդկանց համար, որոնք ցանկանում են մաս կազմել այս մեծ իրադարձությանը, և ստեղծել ջերմ մթնոլորտ, որը ընտանիքներին ու երեխաներին հնարավորություն կտա հեշտությամբ այցելել ակումբային մրցաշրջանի ամենախոշոր ու կարևոր հանդիպմանը։
Այլ քաղաքներից ժամանած երկրպագուների համար սա կնշանակի հանրային տրանսպորտից օգտվելու հնարավորությունների բարելավում՝ հատկապես հանդիպումից հետո, ինչպես նաև ավելի անվտանգ ու հարմարավետ վերադարձ մարզադաշտից։
Կազմակերպիչ քաղաքների համար սա կամրապնդի միջոցառման տնտեսական դրական ազդեցությունը, քանի որ երկրպագուներին հնարավորություն կտրվի շարունակել տոնական տրամադրությունը։
Հեռարձակման նոր ժամի սահմանումը կխթանի ժամանակացույցի առավել հարմարեցված ձևավորումը, ինչի շնորհիվ եզրափակիչը կհասնի համաշխարհային հեռուստատեսային ու թվային ավելի լայն լսարանին՝ առանձնահատուկ շեշտ դնելով երիտասարդ հանդիսատեսի հետաքրքրության վրա»,- նշված է ՈՒԵՖԱ-ի հայտարարության մեջ։
2025/26 մրցաշրջանում ակումբային ամենահեղինակավոր մրցաշարի եզրափակիչը կկայանա 2026 թ. մայիսի 30-ին Հունգարիայի մայրաքաղաք Բուդապեշտի «Պուշկաշ Արենա» ստադիոնում։
Հ․Գ․ միացե՛ք Interfootball-ի Telegram-ի ալիքին https://t.me/Interfootball_am
# ՈւԵՖԱ, Չեմպիոնների-լիգա