ՉԼ 1/8 եզրափակիչի երկու հանդիպում, հնարավոր է, անցկացվի չեզոք դաշտում` կապված պարտադիր պատվաստման հետ

Չեմպիոնների լիգայի 1/8 եզրափակիչի ՊՍԺ – «Ռեալ Մադրիդ» դիմակայության առաջին, իսկ «Լիլ» – «Չելսի» դիմակայության պատասխան հանդիպման անցկացման վայրերը, հնարավոր է, փոխվեն` կապված կորոնավիրուսի դեմ պատվաստման պարտադիր լինելու հետ։

Ինչպես հայտնում է ESPN-ը, Ֆրանսիայում օրենսդրական մակարդակով բոլոր սպորտային իրադարձություններին մասնակցող մարզիկներին պարտավորեցնում են լինել կորոնավիրուսի դեմ պատվաստված, ինչը կարող է խոչընդոտել մադրիդյան և լոնդոնյան ակումբների չպատվաստված ֆուտբոլիստներին մուտք գործել այդ երկիր։

«ՈւԵՖԱ-ն մշտապես կապի մեջ է բոլոր շահագրգիռ կողմերի հետ ամբողջ Եվրոպայում՝ փետրվարին եվրագավաթային մրցաշարերի վերսկսումից առաջ:

Յուրաքանչյուր երկրում խաղերի անցկացման կոնկրետ պայմանները կախված են տվյալ երկրի իրավասու մարմինների որոշումներից:

Յուրաքանչյուր ակումբ պետք է հետևի այն երկրի համաճարակային կանոնները, որտեղ հանդիպում է անցկացնելու, սակայն եվրագավաթային հանդիպումների համար մշակվում են կորոնավիրուսի համար հատուկ օրենքներ և հնարավոր են նաև փոփոխություններ»,- նշվում է ՈՒԵՖԱ-ի տարածած հայտարարության մեջ։

Աղբյուրի փոխանցմամբ` հնարավոր է, որ այդ հանդիպումներն անցկացվեն չեզոք մարզադաշտերում։

Ըստ ՈՒԵՖԱ-ի կանոնադրության` նման իրավիճակներում հանդիպման տանտեր ակումբը պետք է առաջարկի խաղն անցկացնելու այլընտրանքային տարբերակ և այն պետք է լինի չեզոք երկրում։

Հատկանշական է, որ տարբեր հետազոտություններ պարզել են, որ անգլիական Պրեմիեր լիգայում հանդես եկող ֆուտբոլիստների 16%-ը չեն ստացել կորոնավիորսի դեմ պատվաստանյութի նույնիսկ մեկ չափաբաժին, սակայն «Չելսին» չի արձագանքել այս տեղեկատվությանը։

Հավելենք, որ ՊՍԺ – «Ռեալ Մադրիդ» հանդիպումը կկայանա փետրվարի 15-ին, իսկ «Լիլ» – «Չելսի» հանդիպումը` մարտի 16-ին։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am