Չելսիի խաղը երերում է, Լեսթերի հաղթարշավն ընդհատվեց?

Անգլիական պրեմիեր լիգայում շարունակվում է 17-րդ տուրը։ Երկրորդ հորիզոնականում ընթացող «Լեսթերը» նախքան այս տուրը ԱՊԼ-ի շրջանակում տարել էր 8 անընդմեջ հաղթանակ։ Թվում էր՝ Բրենդան Ռոջերսի սաներն այսօր պետք է խնդիրներ չունենան հետնապահների թվում ընթացող «Նորվիչի» դեմ խաղում, սակայն «աղվեսներին» չհաջողվեց կոտրել հյուրեի դիմադրությունը։ Թիմերը վաստակեցին մեկական միավոր, իսկ խաղն ավարտվեց 1։1 հաշվով։

Հանդիպման հաշիվը 26-րդ րոպեին բացեց ֆինն գոլահար Տեմո Պուկին, իսկ 38-րդ րոպեին Ջեյմի Վարդիի հարվածից հետո գնդակը սեփական դարպասն ուղարկեց հյուրերի դարպասապահ Թիմ Կրուլը՝ դառնալով ինքնագոլի հեղինակ։ Չնայած տանտերերը հանդիպման մնացած ժամանակահատվածում ստեղծեցին մի շարք գոլային պահեր, այդպես էլ չկարողացան խփել հաղթական գնդակը։

«Լեսթերը» վաստակեց 39 միավոր և շարունակում է զբաղեցնել 2-րդ հորիզոնականը, իսկ «Նորվիչը» 12 միավորով նախավերջին հորիզոնականն է զբաղեցնում։

Ֆրենկ Լեմպարդի գլխավորած «Չելսին» չի կարողանում գտնել իր խաղի կայունթյունը։ Այսօր «ազնվականներն» վերջին հինգ խաղում կրեցին չորրորդ պարտությունը։ Լոնդոնյան ակումբն այս անգամ սեփական հարկի տակ 0։1 հաշվով պարտվեց «Բորնմութին»։

Հանդիպման միակ գնդակը խփվեց 84-րդ րոպեին։ Գոլի հեղինակ դարձավ Դան Գոսլինգը։

«Չելսին» 29 միավորով շարունակում է զբաղեցնել մրցաշարային աղյուսակի 4-րդ հորիզոնականը, սակայն մի շարք թիմեր արդեն կտրուկ մոտեցել են «կապույտներին»։ Ակնհայտ է, որ «Չելսին» ձմռանն անհրաժեշտ է համալրումներ։ Իսկ «Բորնմութն» ընդհատեց պարտությունների շարքը և 19 միավորով բարձրացավ 14-րդ հորիզոնական։

ԱՊԼ-ի ընթացիկ մրցաշրջանի բացահայտումներից «Շեֆիլդ Յունայթեդը» շարունակում է հիանալի արդյունքներ գրանցել։ Այս անգամ Քրիս Ուայլդերի սաների զոհը դարձավ «Աստոն Վիլան»։ «Շեֆիլդը» հաղթեց 2։0 հաշվով։ Տանտերերին հաղթանակ պարգևեց Ջոն Ֆլեկի դուբլը։

«Շեֆիլդ Յունայթեդը» վաստակեց 25 միավոր, ժամանակավորապես բարձրացավ 5-րդ հորիզոնական՝ 4-րդ տեղում ընթացող «Չելսիին» զիջելով ընդամենը 4 միավոր։ «Աստոն Վիլան» կրեց երրորդ անընդմեջ պարտությունը և 17 միավորով զբաղեցնում է 17-րդ հորիզոնականը։

Կայացել է ևս մեկ հանդիպում, որի շրջանակում «Բյորնլին» սեփական հարկի տակ 1։0 հաշվով առավելության հասավ «Նյուքասլի» նկատմամբ։