Մյուլլեր. «Մեսսիի դեմ խաղերում Բավարիայի գործերը միշտ լավ են»

Չեմպիոնների լիգայի 1/8 եզրափակիչի պատասխան խաղում «Բավարիան» 2:0 հաշվով հաղթեց ՊՍԺ-ին` նվաճելով մրցաշարի քառորդ եզրափակիչի ուղեգիր։

Հանդիպումից հետո իր տպավորություններով է կիսվել մյունխենյան ակումբի կիսապաշտպան Թոմաս Մյուլլերը։

«Լեո Մեսսիի դեմ խաղերում «Բավարիայի» գործերը միշտ լավ են արդյունքի և մյուս բոլոր տեսանկյուններից։

Ակումբային մակարդակում մեր խնդիրը միշտ եղել է Կրիշտիանու Ռոնալդուի ժամանակների «Ռեալը», սակայն ես անչափ հարգում եմ Մեսսիին այն բանի համար, թե նա ինչպես հանդես եկավ աշխարհի առաջնությունում։

Մեսսիի անհատական ​​ելույթն աշխարհի առաջնությունում անհավանական էր։ Նա առաջնորդում էր ողջ թիմին։

Խաղալ այնպիսի ակումբում, ինչպիսին ՊՍԺ-ն է, հեշտ չէ։ Նման թիմում շատ դժվար է լավ հավասարակշռություն ստեղծել։ Անհատներն օգնում են հաղթել շատ հանդիպումներում»,- Մյուլլերի խոսքերը մեջբերում է Kicker-ի լրագրող Գեորգ Հոլցները։

Նշենք, որ Լեո Մեսսին բավական անհաջող է հանդես գալիս «Բավարիայի» դեմ անցկացրած խաղերում։

Արգենտինացի հարձակվողը բոլոր մրցաշարերում 8 անգամ է բախվել մյունխենյան ակումբի դեմ, որոնց շրջանակում կրել է 5 պարտություն, հաղթել միայն 2 խաղում, 1 անգամ էլ գրանցվել է ոչ-ոքի։

Հատկանշական է, որ Մեսսին Չեմպիոնների լիգայում ամենաշատ պարտությունները կրել է հենց «Բավարիայից»։

Այդ ցուցանիշով երկրորդը նրա ներկայիս ակումբն է` ՊՍԺ-ն, որից «Բարսելոնայում» հանդես գալու տարիներին կրել է 3 պարտություն։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am