Միլանը կենտրոնական հարձակվողների շորթ-լիստ է կազմել

2021 թվականի հունվարից 1-ից բացվելիք ձմեռային տրանսֆերային պատուհանին «Միլանը» պատրաստվում է որոշակի ակտիվություն ցուցաբերել։

Ինչպես տեղեկացնում է Tuttosport-ը, «ռոսոներիները» մտադիր են ձեռք բերել նոր կենտրոնական հարձակվող, ով կփոխարինի Զլատան Իբրահիմովիչին, վերջինս հաճախ է վնասվածքներ ստանում։

Միլանյան ակումբն արդեն կազմել է մի շարք հարձակվողներից բաղկացած շորթ-լիստ, ովքեր, ըստ ակումբի մարզչական շտաբի, իրապես կարող են ուժեղացնել հարձակման կրակածայրի խնդիրը։

Այդ դիրքի համար դիտարկվում են Լուկա Յովիչի («Ռեալ Մադրիդ»), Դոնել Մալենի (ՊՍՎ), Արկադիուշ Միլիկի և Ֆերնանդո Լյորենտեի (երկուսն էլ «Նապոլի») թեկնածությունները։ Քննարկվում է նաև «Սասուոլոյի» 21-ամյա հարձակվող Ջանլուկա Սկամակայի տարբերակը։ Սկամական ընթացիկ մրցաշրջանը վարձակալությամբ անցկացնում է «Ջենոայի» կազմում։

Աղբյուրի փոխանցմամբ՝ «Միլանը» մտադիր է ամրապնդել նաև պաշտպանությունն ու կիսապաշտպանությունը։ Պաշտպանության ուժեղացման հիմնական թեկնածուն ֆրանսիական «Ստրասբուրգի» 20-ամյա կենտրոնական պաշտպան Մոհամեդ Սիմականն է։

Կիսապաշտպանության գծի համար ակումբը հետաքրքրված է Բուբակարե Սումարեի («Լիլ») և Անդրե-Ֆրանկ Զամբոյի («Ֆուլհեմ») ծառայություններով, սակայն այս պարագայում ավելի հավանական է վարձակալության տարբերակը։