Մեսսիի ծառայություններով երկու ակումբ է հետաքրքրված, որոնք կապվել են նրա հետ

«Բարսելոնայի» ավագ Լեո Մեսսին ավելին քան երբեք մոտ է ակումբից հեռանալուն։

Ինչպես տեղեկացնում է Mundo Deportivo-ի լրագրող Ֆրանսեսկ Ագլիարը, արգենտինացի ֆուտբոլիստի ծառայություններով հետաքրքրված են երկու ակումբներ՝ ՊՍԺ-ն և «Ինտերը»։ Հայտնի է, որ այդ ակումբների ներկայացուցիչները կապվել են Լեո Մեսսիի հայրիկի՝ Խորխե Մեսսիի հետ՝ հասկանալու, թե ինչպես են զարգանում խաղացողի շուրջ իրադարձությունները։

Աղբյուրի փոխանցմամբ՝ ֆրանսիական ակումբն արդեն հստակ ուսումնասիրել է հավանական տարբերակները, թե ինչպես է պայմանագիր կնքելու Մեսսիի հետ, իսկ ակումբի ներսում գիտեն, թե ինչպես խուսափեն ՈՒԵՖԱ-ի ֆինանսական fair-play-ի կանոնները խախտելուց։ Փարզիը դուր է գալիս ինչպես Մեսսիին, այնպես էլ նրա կնոջը՝ Անտոնելլային։

Վերջին շրջանում արգենտնիացի ֆուտբոլիստի ծառայություններով ակտիվորեն սկսել է հետաքրքրվել նաև «Ինտերը»։ Այդ տեղեկություններն ավելի հաճախակիացան, երբ հայտնի դարձավ, որ խաղացողի հայրը՝ Խորխե Մեսսին իր բիզնեսը Բարսելոնայի տեղափոխել է Միլան, սակայն այդ ամենը պայմանավորված էր նրանով, որ Մեսսի ավագը դժգոհ է Իսպանիայի հարկային օրենսդրությունից, բայց այդ ամենին գումարվեց նաև այն, որ Լեո Մեսսին «Ինտերի» մարզաբազային մոտ տեղայակված թաղամասերից մեկում պենտհաուս ձեռք բերեց։ Նշվում է նաև, որ «ներաձուրիները» Մեսսիին առաջարկել են 5 տարվա պայմանագիր՝ տարեկան 50 մլն եվրո աշխատավարձով։

«Մանչեսթեր Սիթին», որը նույնպես վաղուց հետաքրքրված է արգենտինացի ֆուտբոլիստի ծառայություններով, կարծես թե ներկա պահին չի մտածում հարձակվողին ձեռք բերելու մասին և որևէ քայլ չի ձեռնարկել։

Հաղորդվում է, որ Լեո Մեսսին արդեն մի քանի ամիս է լրջորեն մտածում է «Բարսելոնայից» հեռանալու մասին։ Նրան չի բավարարում ինչպես «բլաուգրանասի» գրանցած վերջին արդյունքները, այնպես էլ ակումբի ներքի մթոնոլորտը, որն ավելի է սրվել «Բավարիայից» 2։8 հաշվով կրած պարտությունից հետո։

Երեկ՝ օգոստոսի 20-ին, տեղեկատվություն տարածվեց, որ «կապտանռնագույնների» նորանշանակ գլխավոր մարզիչ Ռոնալդ Կումանը հանդիպում է ունեցել Մեսսիի հետ, որը, սակայն, չի տվել իր արդյունքը․ Մեսսին ակնարկել է, որ մտադիր է հեռանալ ակումբից։