Մարտինես . «Հանուն Մեսսիի պատրաստ եմ նույնիսկ մեռնել»

Արգենտինայի հավաքականի և «Աստոն Վիլլայի» դարպասապահ Էմիլիանո Մարտինեսը Ole-ին տված հարցազրույցի ժամանակ պատմել է, թե ինչ նշանակություն ունի իր կյանքում Լեո Մեսսին։

– Մեսսին Instagram -ում լուսանկար էր հրապարակել և ձեզ անվանել «գազան»։ Ինչպե՞ս արձագանքեցիք դրան։

– Ես կորցրել էի խոսելուս ունակությունը, երբ տեսա այդ նկարը։ Այդ խոսքերն ու լուսանկարն ես հավերժ կպահեմ իմ սրտում։ Այն ամենը, ինչ նա արել է իմ հանդեպ, ինձ մեծ ուժ տվեց, որպեսզի եզրափակիչ խաղում գնդակներ հետ մղեմ և դառնամ ավելի ուժեղ։

Այն ամենից հետո, երբ նա ինձ ֆենոմեն է անվանում, ինչպե՞ս կարող էի ես ձախողել եզրափակիչը։ Ես հանուն Մեսսիի պատրաստ եմ նույնիսկ մեռնել` զոհելով կյանքս։ Ես դեռ 4-5 ամիս առաջ էի ասում, որ համաձայն եմ` Մեսսին ինձնից շուտ հաղթի Կոպա Ամերիկան։

Նույնիսկ բրազիլացիներն էին հանուն Մեսսիի Արգենտինային հաղթանակ ցանկանում. էլ չեմ խոսում հենց արգենտինացիների մասին։

Հուսով եմ` մենք կօգնենք Մեսսիին հաղթել նաև աշխարհի առաջնությունը,- եզրափակել է 28-ամյա դարպասապահը։

Հիշեցնենք, որ հուլիսի 11-ին կայացած Կոպա Ամերիկայի եզրափակչում Արգենտինայի հավաքականը 1:0 հաշվով հաղթեց Բրազիլիային` նվաճելով բաղձալի գավաթը։

Լեո Մեսսին «ալբիսելեստեի» կազմում նվաճեց առաջին գավաթը, իսկ Էմիլիանո Մարտինեսը դարձավ մրցաշարի հերոսներից մեկը և ճանաչվեց Կոպա Ամերիկայի լավագույն դարպասապահ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am