Մարտինեսի բենեֆիսը. Արգեինտինան 11-մետրանոցներով հաղթեց Նիդեռլանդներին` դուրս գալով ԱԱ-2022-ի կիսաեզրափակիչ🎥
ԱԱ-2022-ի 1/4 եզրափակիչի շրջանակում Արգենտինայի հավաքականը Լուսայիլում մրցեց Նիդեռլանդների ընտրանու դեմ։
Առաջին կեսում կողմերը հիմնականում գործում էին զգուշավոր և չէին ցանկանում ռիսկի դիմել։
Արգենտինացիները ժամանակի ընթացքում տիրեցին նախաձեռնությանը և 35-րդ րոպեին բացեցին հաշիվը. Լեո Մեսսիի հիասքանչ փոխանցումից հետո աչքի ընկավ Նահուել Մոլինան։
Կողմերն ընդմիջման գնացին 1:0 հաշվի պայմաններում։
Երկրորդ կեսում էլ պատկերը գրեթե նույնն էր. հավաքականները, մեծ հաշվով, վտանգավոր գրոհներ չէին անցկացնում, սակայն 73-րդ րոպեին Լիոնել Սկալոնիի թիմը վաստակեց 11-մետրանոց։
Գնդակին մոտեցավ Լեո Մեսսին, ով դիպուկ հարվածով կրկնապատկեց «ալբիսելեստեի» առավելությունը։
«Նարնջագույնները», ովքեր հանդիպման ընթացքում ոչ մի իրական գոլային պահ չէին ունեցել, ինչպես ամրոպ անամպ երկնքում, կրճատեցին հաշվի տարբերությունը. 83-րդ րոպեին գլխի դիպուկ հարվածով աչքի ընկավ փոխարինման դուրս եկած Վաութ Վեգորսթը։
Խփած գոլից հետո Լուի վան Գալի թիմը քիչ մնաց նաև հավասարեցներ հաշիվը, սակայն 85-րդ րոպեին Լյուկ դե Յոնգի հուժկու հարվածը մի փոքր շեղ ստացվեց։
Հանդիպման վերջնամասում կրքերը շատ թեժ էին. հոլանդացիները մեծ ուժերով նետվել էին առաջ` փրկելու խաղը։
Թվում էր` «ալբիսելեստեն» կդիմանան այդ ճնշմանը, սակայն 90+11-րդ րոպեին Լուի վան Գալի թիմը կարողացավ փրկել խաղը։
«Նարնջագույնները» նպաստավոր դիրքում տուգանային հարվածի իրավունք վաստակեցին։
Բոլորը կարծում էին, թե Տյոն Կոպմեյներսը կհարվածի այդ դիրքից, սակայն վերջինս անչափ խելացի վարվեց և գնդակը փոխանցեց մրցակցի տուգանային հրապարակում գտնվող Վաութ Վեգհորսթին, ով էլ հերոսացավ և գրավեց Էմիլիանո Մարտինեսի պաշտպանած դարպասը` հաշիվը դարձնելով 2:2։
Ամեն դեպքում, հանդիպման հիմնական ժամանակում կողմերը չպարզեցին հաղթողին, ինչից հետո խաղը տեղափոխվեց լրացուցիչ ժամանակ։
Լրացուցիչ առաջին խաղակեսում կողմերը «քնած» էին և ոչինչ չառաջարկեցին միմյանց։
Լրացուցիչ երկրորդ խաղակեսի վերջնամասում Արգենտինան հսկայական ճնշում էր գործադրում Անդրիս Նոպերտի պաշտպանած դարպասի ուղղությամբ։
«Ալբիսելեստեն» ունեցավ 4-5 իրական գոլային պահ, սակայն այդպես էլ չհաջողվեց կորզել հաղթանակ։
Լրացուցիչ ժամանակում գոլեր չարձանագրվեցին, իսկ կողմերը հաղթողին պարզելու համար իրացրին 11-մետրանոց հարվածաշար։
Վիճակախաղում ավելի դիպուկ գտնցեցին Արգենտինայի հավաքականի ֆուտբոլիստները` հաղթելով 4:3 հաշվով։
Այսպիսով, Արգենտինայի հավաքականը նվաճեց ԱԱ-2022-ի կիսաեզրափակիչ, որի շրջանակում կմրցի Խորվաթիայի ընտրանու դեմ։
Հ․Գ․ միացե՛ք Interfootball-ի Telegram-ի ալիքին https://t.me/Interfootball_am