Մարկո Ասենսիոն շատ մոտ է ակումբային գրանցումը փոխելուն

«Ռեալ Մադրիդի» կիսապաշտպան Մարկո Ասենսիոն, ամենայն հավանականությամբ, ընթացիկ մրցշարջանի ավարտից հետո ազատ գործակալի կարգավիճակում կհեռանա ակումբից։

Ինչպես տեղեկացնում է ինսայդեր Ֆաբրիցիո Ռոմանոն, իսպանացի ֆուտբոլիստի ու «արքայական» ակումբի միջև գործող պայմանագիրն ավարտվում է սույն թվականի հունիսի 30-ին, որի երկարաձգման հարցում կողմերը չեն կարողանում համաձայնության հասնել։

Աղբյուրի փոխանցմամբ` 27-ամյա ֆուտբոլիստին իր շարքերում է ցանկանում տեսնել ՊՍԺ-ն, որն արդեն բանավոր համաձայնության է հասել վերջինիս հետ։

Կողմերը պայմանագիրը կնքելու են մինչև 2027 թ. հունիսի 30-ը, իսկ Ասենսիոյի տարեկան աշխատավարձը լինելու է 8 մլն եվրո։

Ասենսիոյի ծառայություններով հետաքրքրված է եղել նաև «Աստոն Վիլլան», որը գրեթե նույն պայմաններով պայմանագիր էր առաջարկել նրան, սակայն իսպանացի ֆուտբոլիստը նախապատվությունը տալիս է «Պարի Սեն-Ժերմեն» տեղափոխվելուն։

Բացի դրանից, Ասենսիոյի գործակալ Ժորժե Մենդեշը հիանալի հարաբերություններ ունի ՊՍԺ-ի ղեկավարության հետ, ինչը նույնպես խթանում է գործարքի իրականացմանը։

Ռոմանոն հաստատում է, որ Ասենսիոյի տեղափոխության հարցում փարզիյան ակումբի խորհրդական Լուիշ Կամպուշն առանցքային դերակատարություն ունի։

58-ամյա ֆունկցիոները դեռևս նախորդ ամռանն էր փորձում ձեռք բերել Մարկո Ասենսիոյին, սակայն գործարքը չկայացավ։

Իտալացի ինսայդերը գրում է նաև, որ 27-ամյա ֆուտբոլիստի ծրագրերում այժմ փոփոխություն չկա. նա դեռևս մեկ շաբաթ առաջ որոշել է հեռանալ «Ռեալից» և սպասում է, թե երբ է իր գործակալը վերջնական համաձայնության հասնելու ՊՍԺ-ի հետ։

Ակնկալվում է, որ առաջիկա օրերին կողմերը պաշտոնապես կհայտարարեն այս գործարքի մասին։

Հիշեցնենք, որ Մարկո Ասենսիոն «Ռեալ Մադրիդի» կազմում հանդես է գալիս 2016 թ. հունիսից` անցկացրած 285 խաղում դառնալով 61 գոլի և 32 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am