Համբարձումյանը կհամալրի Կիպրոսի բազմակի չեմպիոնի կազմը

Հայաստանի ազգային հավաքականի եզրային պաշտպան Հովհաննես Համբարձումյանը, ով ներկայումս հանդես է գալիս Կիպրոսը ներկայացնող «Էնոսիսի» կազմում, պայմանագրի ավարտից հետո, ամենայն հավանականությամբ, կհեռանա ակումբից։ Հայ պաշտպանի պայմանագիրն ուժի մեջ է մինչև 2020 թվականի մայիսի 31-ը։

Ինչպես տեղեկացնում է 24sport պարբերականը, հայազգի պաշտպանը կարիերան կշարունակի Կիպրոսի բազմակի չեմպիոն «Անորտոսիսի» կազմում։ Աղբյուրի փոխանցմամբ՝ գործարքը կարելի է կայացած համարել, սակայն դեռևս պաշտոնական հայտարարություն չկա, սակայն մոտ օրերս կլինի։

Կիպրոսի առաջնության կայացած 22 տուրերից հետո «Անորտոսիսն» զբաղեցնում է 2-րդ հորիզոնականը՝ ունենալով հավասար՝ 43 միավոր «Օմոնիայի» հետ։ Նշենք, որ «Անորտոսիսը» Կիպրոսի 13-ակի չեմպիոն է։

Հովհաննես Համբարձումյանը «Էնոսիսի» կազմում ընթացիկ մրցաշրջանում մասնակցել է 18 հանդիպման՝ դառնալով 3 գոլի և 1 գոլային փոխանցման հեղինակ։