Կոպա Ամերիկա. Վենեսուելան կամային հաղթանակ տարավ Էկվադորի նկատմամբ🎥

Կոպա Ամերիկա-2024-ի B խմբի առաջին տուրում ԱՄՆ-ի Սանտա Կլառա քաղաքի «Լիվայս» մարզադաշտում միմյանց դեմ մրցեցին Էկվադորի ու Վենեսուելայի հավաքականները։

Հանդիպումը բավական հետաքրքիր ընթացք ունեցավ. էկվադորցիները 22-րդ րոպեին մնացին 10 հոգով։ Թիմի ավագ և առաջատար Էներ Վալենսիան կոպիտ խաղի պատճառով հեռացվեց դաշտից։

Չնայած դրան` Ֆելիքս Սանչես Բասի գլխավորած հավաքականը նախքան ընդմիջում անգլիական «Բրայթոնի» վինգեր Ժերեմի Սարմիենտոյի գոլի շնորհիվ 40-րդ րոպեին բացեց հաշիվը։

Այդուհանդերձ, երկորդ կեսում վենեսուելացիները, ունենալով քանակական առավելություն, բեկեցին հանդիպման ընթացքն ու կամային հաղթանակ տարան. 64-րդ ու 74-րդ րոպեներին աչքի ընկան համապատասխանաբար Ժոնդեր Կադիսն ու Էդուարդ Բելիոն։

Այսպիսով, Վենեսուելայի հավաքականն առավելության հասավ 2:1 հաշվով։

Նշենք, որ «լա վինոտինտոն» Ամերիկայի գավաթի խաղարկությունում նախորդ հաղթանակը տարել էր ուղիղ 5 տարի առաջ, երբ 2019 թ. հունիսի 22-ին 3:1 հաշվով ուժեղ գտնվեց Բոլիվիայից։

Առաջին տուրում B խմբում կայացել է ևս մեկ հանդիպում.

Մեքսիկա 1:0 Ճամայկա

Առաջին տուրից հետո խումբը լրացուցիչ ցուցանիշներով գլխավորում է Վենեսուելայի հավաքականը։ Մեքսիկան երկրորդ տեղում է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am