Լեո Մեսսիի մամուլի ասուլիսի ամենակարևոր հատվածները🎥
«Բարսելոնայի» արդեն նախկին հարձակվող Լեո Մեսսին օգոստոսի 8-ին «Կամպ Նոու» մարզադաշտում մամուլի ասուլիս է տվել` հրաժեշտ տալով իր թիմին ու խաղընկերներին։
Նախ մամուլի ասուլիսը դեռ չսկսված` Լեո Մեսսին չկարողացավ զսպել իր արցունքները, ապա նույնը տեղի ունեցավ, երբ Մեսսին ավարտել էր իր ելույթը. այդ պահին բոլոր ներկաները հոտնկայս ծափահարում էին արգենտինացի ֆուտբոլիստին, իսկ նա կրկին արտասվում էր։
Այժմ կետ առ կետ կներկայացնենք Լեո Մեսսիի մամուլի ասուլիսի ամենակարևոր հատվածները։
- Ես համոզված էի, որ մնալու եմ «Բարսելոնայում»։ Սա իմ տունն է, մեր տունը։ Ես ցանկանում էի մնալ «Բարսայում», և դա իմ նպատակն էր, սակայն ամբողջ կյանքս այստեղ անցկացնելուց հետո ես ստիպված եմ հրաժեշտ տալ բոլորին։
- Հուսով եմ` ինչ-որ պահ կկարողանամ վերադառնալ «Բարսելոնա», որպեսզի կրկին դառնամ ակումբի մի մասը։ Ցանկանում եմ ինչ-որ դեր ունենալ ակումբի համար և անել որևէ բան, որ «Բարսելոնան» մնա աշխարհի լավագույն ակումբը։
- Այո՛, ՊՍԺ-ն կարիերայիս շարունակության հաջորդ հավանական տարբերակն է, սակայն ներկա պահին պաշտոնապես որևէ բան հաստատված չէ։ «Բարսելոնայի» հայտարարությունից հետո շատ ակումբներից եմ հեռախոսազանգեր ստացել։ Ոչինչ ստորագրված չէ և այժմ դեռ բանակցում ենք։
- Տխրությունս շատ մեծ է, քանի որ լքում եմ աշխարհի լավագույն ակումբը։ Տխուր եմ, քանի որ չեմ ցանկանում հեռանալ այն ակումբից, որին սիրում եմ։ Երբեք չէի սպասում, որ օրերից մի օր կհեռանամ «Բարսելոնայից»։ Նախորդ տարի ես, իրոք, ցանկանում էի հեռանալ, սակայն ոչ հիմա։ Ահա, թե ինչու եմ այժմ այսքան տխուր։
- Ակումբն ամեն ինչից վեր է. բոլորն արդեն սովորել են դրան։ Սկզբնական շրջանում անսովոր կլինի, սակայն «Բարսելոնան» հիանալի ֆուտբոլիստներով է համալրվել։
- Ինձ համար մինչ այժմ ցավոտ է, որ չկարողացա ևս մեկ Չեմպիոնների լիգա հաղթել։ Երբ տեղի էր ունենում «Լիվերպուլի» դեմ կիսաեզրափակիչը, մենք այդ պահին շատ մոտ էինք կրկին գավաթը նվաճելուն։ Մենք կարող էինք ևս մեկ ՉԼ հաղթել, սակայն ես ոչնչի համար չեմ ափսոսում։
- Իմ նպատակը հաղթելն է։ Ցանկանում եմ ևս մի քանի տիտղոս նվաճել և շրջանցել Դանի Ալվեսին։ Ամեն դեպքում, ես կփորձեմ դա անել։
- Իմ պայմանագիրը «Բարսելոնայի» հետ ամբողջությամբ համաձայնեցված էր։ Ամեն ինչ հաստատված էր… Ես ցանկանում էի մնալ ակումբում, և երբ վերադարձա արձակուրդից, ամեն ինչ այնքան պարզ էր թվում։
- Ես աշխատավարձս նվազեցրել էի 50%-ով։ Այն լուրերը, թե ես իմ աշխատավարձը նվազեցրել էի 30%-ով, լրիվ սուտ են։ Ես առաջարկել եմ աշխատավարձս կրճատել 50%-ով, ինչից հետո այլ խոսակցություն այդ թեմայով չեն եղել։
- Իրականում, «Բարսելոնայի» հետ կապված որևէ խնդիր չի եղել։ Ես ցանկացած հարցում լավ հարաբերություններ եմ ունեցել ակումբի հետ։ Մենք համաձայնության էինք հասել բոլոր կետերի շուրջ և ինձ համոզել էին մնալ «Բարսելոնայում», սակայն դա անհնար էր Լա լիգայի օրենքների պատճառով։
- Քրիստիան Ռոմերոյի տրանսֆերի հետ կապված յուրաոանչյուր լուր նույնպես կեղծ է եղել։
Հիշեցնենք, որ օգոստոսի 5-ին հայտնի դարձավ, որ Լեո Մեսսին հեռանում է «Բարսելոնայից», քանի որ կատալոնական ակումբը, Լա լիգայի ֆինանսական ու համակարգային խոչընդոտների պատճառով, չի կարող գրանցել արգենտինացի ֆուտբոլիստի հետ կնքվելիք պայմանագիրը։
Հ․Գ․ միացե՛ք Interfootball-ի Telegram-ի ալիքին https://t.me/Interfootball_am
# Բարսելոնա, Լեո Մեսսի, ՊՍԺ, տրանսֆերներ