«Ինտերի» դարպասապահը մահվան ելքով վրաերթ է կատարել

«Ինտերի» դարպասապահ Խոսեպ Մարտինեսը մահվան ելքով վրաերթ է կատարել, հայտնում է La Gazzetta dello Sport-ը։

Ճանապարհատրանսպորտային պատահարը տեղի է ունեցել հոկտեմբերի 28-ի առավոտյան Իտալիայի Ֆեներգո համայնքի Կոմո քաղաքում։

Իսպանացի դարպասապահի վարած մեքենան հարվածել է 81-ամյա տարեց տղամարդու, որը եղել է հաշմանդամության էլեկտրական սայլակով։

Թեև միջամտել են շտապօգնության ծառայությունը, փրկարարական ուղղաթիռը և ոստիկանները, տուժածը տեղում մահացել է։

27-ամյա ֆուտբոլիստը վնասվածքներ չի ստացել, բայց ներկաների խոսքով` նա գտնվել է շոկային վիճակում։

Ըստ նախնական տվյալների` տարեց տղամարդը, մեծ հավանականությամբ, իրեն վատ է զգացել, ինչի հետևանքով փոխել է սայլակի ուղղությունն ու հայտնվել Մարտինեսի վարած մեքենայի դիմաց։

Նշվում է` այն ճանապարհը, որտեղ տեղի է ունեցել պատահարը, առանց բաժանարար գծերի է։

Մարտինեսն անմիջապես փորձել է օգնություն ցուցաբերել տղամարդուն։ Նա այժմ համագործակցում է իրավապահ մարմինների հետ` դեպքի մանրմանասները պարզելու համար։

Խոսեպ Մարտինեսը միլանյան գրանդում հանդես է գալիս 2024թ. հուլիսից, 12 խաղից 7-ում դարպասն անառիկ է պահել։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am