Ինտերը ձեռքից բաց թողեց հաղթանակը, Ռոնալդուն չի դադարում գոլեր խփել, Հենոն օգնում է Ռոմային?
Իտալական Ա սերիայի 16-րդ տուրի շրջանակում արդեն կայացել է 9 հանդիպում, որոնց արդյունքների մասին կծանոթնանաք միասին։
Մրցաշարային աղյուսակի երկրորդ հորիզոնականը զբաղեցնող «Յուվենտուսը» սեփական հարկի տակ մրցեց «Ուդինեզեի» դեմ և 3։1 հաշվով տարավ վստահ հաղթանակ։
Թուրինցիներին հաղթանակ պարգևեցին Լեո Բոնուչչին և Կրիշտիանու Ռոնալդուն, վերջինս դարձավ դուբլի հեղինակ։ Հյուրերի կազմից աչքի ընկավ Ինգասիո Պուզետոն։
Նշենք, որ այդ դուբլի շնորհիվ Ռոնալդու բացառիկ ցուցանիշ գրանցեց՝ դառնալով միակ խաղացողը թոփ-5 առաջնություններում, ում հաջողվել է 15 մրցաշրջան անընդմեջ դառնալ 10 և ավելի գոլի հեղինակ։ Կրիշն այժմ բոլոր մրցաշարերը միասին վերցրած 11 գոլի հեղինակ է դարձել ընթացիկ մրցաշրջանում, որից 9-ը հեղինակել է ներքին առաջնությունում։
Առաջնության առաջատար Միլանի «Ինտերը» Չեմպիոնների լիգայից դուրս մնալուց հետո դեռևս հոգեբանորեն չի վերականգնվել, ինչն ակնհայտ էր երեկվա «Ֆիորենտինայի» դեմ հանդիպման ընթացքում։
8-րդ րոպեին Բորխա Վալերոյի ջանքերով բացելով հաշիվը՝ միլանյան ակումբն այդպես էլ չկարողացավ խփել երկրորդ գնդակը։ Իսկ «մանուշակները» հանդիպման ամենավերջում կարողացան արդյունավետ հակագրոհ անցկացնել։ 90+2-րդ րոպեին հիանալի անցումից հետո, աչքի ընկավ Դուշան Վլահովիչը։
Չեմպիոնների լիգայի ուղեգրի համար պայքարող Հռոմի «Ռոման» սեփական հարկի տակ մրցեց հետնապահ ՍՊԱԼ-ի դեմ։ Պաուլու Ֆոնսեկայի սաները 3։1 հաշվով տարան կամային հաղթանակ։
Առաջին խաղակեսի վերջնամասում Անդրեա Պետանյան հստակորեն իրացնելով 11 մետրանոցը՝ առաջ մղեց հյուրերին։ Սակայն, հռոմեցիները երկրորդ խաղակեսում Դիեգո Պերոտիի, Հենրիխ Մխիթարյանի գոլերի, ինչպես նաև Նենադ Տոմովիչի ինքնագոլի շնորհիվ տարան կամային հաղթանակ։
Նշենք նաև, որ Հայաստանի հավաքականի ավագ Հենրիխ Միխթարյանը 79-րդ րոպեին դուրս եկավ փոխարինման և ընդամենը 4 րոպե անց դարձավ գոլի հեղինակ։
«Միլանը» սեփական հարկի տակ չկարողացավ կոտրել «Սասուոլոյի» դիմադրությունը։ Հյուրերի դարպասապահ Ջանլուկա Պեգուլոն, ով Ա սերիայի վերջին 5 մրցաշրջաններում դաշտ էր դուրս եկել 9-րդ անգամ, իսկ ընթացիկ մրցաշրջանում առաջին անգամ, հրաշքներ էր գործում դարպասային հրապարակում՝ կատարելով 12 սեյվ։ Երկու թիմերին էլ չհաջողվեց գտնել մրցակցի դարպասի բանալին․ խաղն ավարտվեց գոլազուրկ ոչ-ոքի արդյունքով։
Դե իսկ «Նապոլիի» անհաջող խաղերի շարքը շարունակվում է։ Նեապոլիտանական ակումբին չօգնեց նույնիսկ գլխավոր մարզչի փոփոխությունը․ Կառլո Անչելոտիին շաբաթվա ընթացքում փոխարինեց Ջենարո Գատուզոն։
Այս անգամ «Նապոլին» սեփական հարկի տակ 1։2 հաշվով պարտվեց «Պարմային»։ Հյուրերին հաղթանակ պարգևեցին Դեյան Կուլսևսկին և Ժերվինիոն, ով հաղթական գնդակը խփեց հանդիպման ամենավերջում։ Տանտերերի կազմից միակ գնդակը հեղինակեց Արկադիուշ Միլիկը։
Նշենք, որ «Նապոլին» Ա սերիայի շրջանակում շուրջ 2 ամիս է չի վայլելե հաղթանակի բերկրանքը՝ առանց հաղթանակի խաղերի շարջը հասցնելով 8-ի։
Ավարտված մյուս հանդիպումներում գրանցվել են հետևյալ արդյունքները․
«Բոլոնիա» 2։1 «Ատալանտա»
«Վերոնա» 3։3 «Տորինո»
«Ջենովա» 0։1 «Սամպդորիա»
«Բրեշիա» 3։0 «Լեչչե»
Տուրի վերջին հանդիպումը կկայանա այսօր՝ 23։45-ին, «Կալյարին» Սարդինայում կմրցի «Լացիոյի» դեմ։
Մրցաշարային աղյուսակն ունի հետևյալ տեսքը․
